Mîtîngê 1’ê Gulane yê Meydanê Tandoganî yêEnqere bi rayraşîyayîşêk dest pêkerd. Girseyo ke vernîya Merkezê Kurlturî yê Ataturkî de ameyo têhet, bi kortejan ver bi mîtîngî rayra şino.

Nuqtayanê kontrolî de, pankartî  yew bi yew ameyî kontrolkerdene. Rayraşîyayîşî de sloganê “Biciwîyo 1’ê Gulane, “Ma do bi xoverdayîşî ser bikewê”, “Yan ma heme pîya yan zî tew yewê ma”, “Roje do bêra AKP hesab bido şarî” yenê qîrayene.

Rêxistina HDP'yî ya Enqere seba ke bale biance serê tecrîdkerdişê Rayberê Şarê Kurdî Abdullah Ocalanî bi fotografanê Leyla Guvene û Nasir Yagizî kewte meydan. Kortejê HDP’yî de cinîyê ke leçegê sipîyî antê xo bi sloganê ”Wa Leyla Guvene biciwîyo”, ”Zîndanan rê azadîye”, ”Leyla Guvene rûmeta ma ya” qîrênê.

Komala Aşitî û Paştdayîşî ya 10'ê Teşrîna Verêne (10 Ekîm-Der) zî  bi pankarta ke resimê 103 kesanê ke Komkiştişê Garî yê Enqera de cuya xo vîndî kerda rayraşîyayîş de cayê xo gênê.