Serekê Komeleya Kulturî ya Pîr Sultan Abdalî Cuma Erçeyî derheqê turê diyînî yê weçînayîşê serekkomarîye de ANFyî rê qisey kerd. 

Erçeyî bale ante krîzê ekonomîkî ser û pare kerd ke heywanî, domanî û cinîyî raştê zorbazîya îqtîdarî yenê. Erçeyî vat: ''Temsîlkarê nîjadperestîye û kanwazî Meclîs de bîyî wayîrê giranîye. Turo diyîn hînî vurîyayo referandumî. Qisey û sîyasetê dişmenê kede, xoza û cinîyan welat visto nê halî. Ganî ma nê weçînayîşî de mabênê tarîtî û roşnîye de tercîhêkî bikerê. Sey Komeleya Kulturî ya Pîr Sultan Abdalî tercîhê ma nê weçînayîşan de dîyar o. Ma seba hemwelatîya têdûşte têkoşîn kenê. Partîyê sîyasîyî bi hawayêkê hacetê weçînayîşî ewnîyenê rayanê elewîyan rê. La ma garantîya çewî nîyê. Kemal Kiliçdaroglu zî bibo serekkomar têkoşînê ma yê heqî do dewam bikero.

Xora tay rexneyê ma est ê la ma rexneyê xo peyê weçînayîşî rê verdayê. Welat hetê raştgîran ra yeno îdarekerdene. Krîzê ekonomîkî ra dima nika nîjadperestîye yena xurtkerdene. Seba ke merdimî meseleyanê rojaneyan ser o nêvinderê nîjadperestîye visîyena rojdem. Ma ney ra aciz ê. Wexto ke rejîmê şexsî biqedo ma do naye ser o qisey bikerê. La karê ma yo verên binvistişê rejîmê Erdoganî û rejîmê tekcamêrdî yo.''