Esnafanê Wanî derheqê waştişanê xo yê weçînayîşanê 14ê gulane de ANFyî rê qisey kerd.

Huseyîn Akdago ke 30 serrî yo aşxane xebitneno vat: ''Ma mîyanê krîzê ekonomîkî yê pîlî de yê û nêeşkenê debara xo bikerê. Peynîya îqtîdarê AKP-MHPyî ameya. Pêlekêka pîyazî bîya hezar û 500 lîra. Bi hezaran merdimî fikranê xo ra semed zîndan de yê. Ez pê bawer a ke Partîya Çep a Keske do 100 wekîlan bişawa Meclîsî û temsîlkarîya ma bikera.''

Esnaf Selamî Yeşîlbaşî vat: ''Qeyûmî 4 reyan ceza daye mi. Qeyûm ziwanê şarê ma ra fam nêkeno. Ganî her kes nê weçînayîşan de baldar bibo. Ma vurnayîşî wazenê. Ma wazenê ke derdê xo vejê. Hewceyê şarê ma bi ney est o.''

Esnaf Nevzat Hamzaogullariyî vat: ''Ma do Wan de 8 de 8 bikerê. Ma xurt ê û hêvîdar ê. Hukmatî pêro pereyî şerî rê xerc kerdî. Hukmat Sûrîye, Tirkîya û Iraq de kewto şer. Ma pê bawer a ke şarê ma pê kayanê îqtîdarî mexapîyo û birêka raşte weçînayîşan de bido.''

Zekî Orukî vat: ''Ez pê bawer kena ke nê weçînayîşan de vurîyayîşêk bibo. Mi zaf weçînayîşî dîyî la çîyo winayên mi nêdî. Seke hukmat ho şino şer. Ez do nê weçînayîşan de seba serekkomarîye raya xo bida Kiliçdarogluyî, seba wekîlîye zî raya xo bida Partîya Çep a Keske.''