Dimayo ke Rayberê Şarê Kurdî Abdullah Ocalan serra 1999 de bi komployêka mîyanneteweyîye esîr ame girewtene, girawa Îmrali de polîtîkaya tecrîdî bi hawayêkê sîstematîkî amî rayraberdene.

Avûkatanê Buroyê Huqûqî yê Çaxî ra Îbrahîm Bîlmezo ke serra 2003 ra nata avûkatîya Ocalanî keno, derheqê şertanê giranan ê tecrîdî de û tesîranê nê tecrîdî de ANF’yî rê qisey kerd.

Bîlmezî nê vatî: “Çîyo ke ma ci ra vanê tecrîd eslê xo de sîstemêk o. No sîstem Sibat a 1999 de netîceyê komploya mîyanneteweyîye de bi teslîmkerdişê Ocalanî bi Tirkîya dest pêkerd. Sey heme zîndanan Zîndanê Îmraliyî zî girêdayeyê Wezaretê Edaletî yo. Hetêna ra Komîteya Vernîgirewtişê Îşkenceyî (CPT) bê ke xebere bido a dewlete eşkena şiro zîndananê ke ûca binpaykerdişê heqan estê. Seba ke rolêko winayên ê CPT’yî esto no meseleyê Îmraliyî de mesuldarîyêk dano serê na sazîye.

Gama ke Mesele Beno Ocalan Mehkemeyî zî Polîtîk Têgêrenê

Muwekîlê mi eşkerayîya xo de bi hawayêkê zelalî îfade kerdo; amacêkê komploya ê wextî estbi. Ê fikranê birêz Ocalanî ra tersayêne. Naye ra înan binpaykerdiş û bêhuqûqîyanê Îmraliyî rê çimê xo girewtî. Qerarê ke hetê MHME ra ameybî dayene muhîm ê. Axir mehkemeyî mekanîzmayê kontrolkerdişê prensîbanê heqanê unîversalan ê. La gama ke vatiş yeno serê birêz Ocalanî mehkemeyî zî polîtîk têgêrenê.

Mesela Komîteya Vernîgirewtişê îşkenceyî baro ke keweno aye ser o bica nêana. Serra 2011’î ra nata tu avûkat nêeşkeno şiro serdana Ocalanî. Keyeyê ci dir zî hal wina yo. Ê 4-5 serran de tena di reyî eşkayî şirê serdana ci. Îmraliyî ra tu xeberêk nêna girewtene. Halêko winayên esto û Komîteya Vernîgirewtişê Îşşkenceyî tu çîyêk nêkeno. Ma tim muracatanê xo kenê û raporanê ke amade kerdê şirawenê. Bi vateyêkê tewr şenikî Komîteya Vernîgirewtişê Îşkenceyî bi bêvengîya xo tecrîdî rê bena hempare.

Birêz Ocalan aktorêko zaf muhîm o. Ez nê seba ke avûkatê ci ya nêvana, her keso ke Rojakewtena Mîyanêne de goreyê eqlî sîyaset kenê nê qebûl kenê. Komara Tirkîya zî nê qebûl kena.

Grevê Vêşanîye ver bi Nuqtayêka Nêagêrayîşî Şinê

Wextêk tayê dîyalogî seba çareserî ameyî ronayene. La îqtîdarî vat ke prosesê çareserî do menfaatêk nêresno ci û proses qedîna. Ma heme Mutabaqatê Dolmabahçeyî zanê. Çi heyf ke îradeyo sîyasî nê rê wayîr nêvejîya. MHP’yî dir îtîfaq viraşt û halo ewroyên vejîya werte. Merdimî seba ke tecrîd wedarîyo grevê vêşanîye de yê. Teberê Leyla Guvene û ê kesanê bînan ê ke sere de dest pêkerdîbî grevê vêşanîye yê bi hezaran tepişteyan keweno roja 60’ine. Wedarîyayîşê tecrîdî beno ke bibo sebebê destpêkê çareserkerdişê meseleyê Kurdan.

Çareserkerdişê meseleyê Kurdan şert o. Ewro yan zî meşte rojêk ganî no mesele bêro halkerdene. Tirkîya bi nê problemî hîna zaf nêeşkena aver şiro. Kam îqtîdar de bo o zî muhîm nêyo. Rayapêroyîye zî û dewlete zî zaf rind zana ke birêz Ocalan na babete de samîmî yo. Bi mi  no şansêk o. Ganî dewlete nê şansî xo dest ra vera medo.”