Semedê protestokerdişê îşxalkarîya dewleta tirkî  û qerarê Amerîka xeylî merkezanê Ewropa de çalakîyî ameyî viraştene.

BERLÎN

Paytextê Almanya Berlîn de bi çalakîyêk hêrişê dewleta tirkî yê serê Rojawanî ameyî protestokerdene. Kurdistanijan û dostanê înan pankartê  Karayilan, Kalkan û Bayikî akerd û qerarê Amerîka şermezar kerd. Çalakwanan Leyla Guvena ke vera tecrîdê serê Ocalanî grevê vêşanîye de ya silam kerde û waşt ke  wa tecrîd bêro wedartene.

FRANKFURT

Bajarê Frankfurtî de zî vernîya konsolosxaneyê Amerîka de bi çalakîyêk  îşxalkarîya Tirkîye yê Rojawanî û ci rê paştîdayîşê Amerîka ameyî protestokerdene.

STOCKHOLM

Paytextê Swêdî Stockholm de zî yew grûba cinîyan fekê xo bi bandê sîyayî pişt û pêkerdişê lêşinî yê Amerîka û Tirkîye yê vera Rojawanî protesto kerdî. Cinîyan semedê paştîdayîşê Rojawanî veng da û waşt ke wa heme şarê kurdî û hetê demokratî wirzê lingan ser.

MÎLANO

Bajarê Mîlano yê Îtalya de zî bi heman waştişî çalakîyêk ameye viraştene. Çalakwanan hêrişê dewleta tirkî yê serê Mexmûr, Şengal û Rojawanî şermezar kerdî, çalakîya Guvene silam kerde û mesajê xoverdayîşî dayî.

BERN

Paytextê  Swîsre Bern de zî Kurdistanijî û hetê demokratî hemverê qerarê  Amerîka û îşxalkarîya dewleta tirkî de kuçeyan de bî. Çalakwanî vernîya Serseferîya Girde ya Amerîka de ameyî pêser, pankartê ‘‘Paştîdayîşê Tirkîye, paştîdyîşê DAÎŞî yo‘‘ akerd û qerarê Amerîka şermezar kerd.

Ewro zî do bajarê Zurîhî de saet 11.00 de vernîya konsoloxanyê Amerîka de çalakîyêk bêro viraştene.