Ewropa de çalakîyê protestokerdişê tecrîdî û paştdayîşê grevê vêşanîye dewam kenî. Vizêr reyna xeylî bajaranê Almanya, Fransa, û Awusturya de çalakîyî ameyî viraştene.

Stuttgart: Bajarê Stuttgartî yê Almanya de mîtîngê paştdayîşê grevê vêşanîye ame viraştene. Çalakîya ke hetê Pltatformê Paştdayîşê Grevê Vêşanîye ra ameye organîzekerdene Dîe Lînke ya pîya xeylî partîyanê sîyasîyan û dezgehanê sivîlan ra temsîlkarî tewrê ci bîyî. Çalakwanan şexsê Leyla Guvene de xoverdayîşê grevê vêşanîye silam kerd û bêvengîya Ewropa şermezar kerde.

Dusselforf: Bajarê Dusselforfî de zî ciwanan ferîbot de bi çalakîyêk bale ante serê grevê vêşanîye û veng da dezgehanê Ewropa ke wezîfeyê xo bica bîyarê.

Marsîlya: Bajarê Marsîlya yê Fransa de zî semedê protestokerdişê tecrîdê serê Ocalanî û paştdayîşê grevê vêşanîye çalakîyêk ameye viraştene. Qiseykerdişan de ame vatene ke rewşa xoverdayoxan kewta merheleya krîtîke û Ewropa ra ame waştene ke vera naye bêveng memano.

Metz: Bajarê Metzî de zî Kurdistanijî û dostê înan kuçeyan de bî. Çalakîye de bêvengîya Ewropa ameye şermezarkerdene.

Vîyana: Paytextê Awusturya Vîyana de zî xoverdayoxê grevê vêşanîye Sûltan Yîgît û Şîyar Agaoglu mabedê Bûdayî yo ke kiştê Çemê Tûnayî de yo zîyaret kerd. Xoverdayoxan mûm û çirayî tafînayî û dûa kerde. Bado zî vilikî eştî Çemê Tûnayî û Rayberê Şarê Kurdî Abdullah Ocalanî rê silamî şawitî.

Freîburg: Bajarê Freîburgî yê Almanya de zî bi çalakîya bêvenge, bêvêngîya Ewropa ameye şermezarkerdene.