Semedê protestokerdişê tecrîdê Îmrali û qerarê Amerîka Ewropa de çalakîyê kudistanijan û dostanê înan bêmabên dewam kenî.

Paytextê Almanya Berlîn de bi tewrbîyayîşê Meclîsê Cinîyan ê  DEST DAN Navdem Berlîn, PYD Berlîn, HDK Berlîn, NAVYEK, Meclîsê Cinîyan ê  EDESA, Ciwanên Şorişgêr, Însîyatîfê Azadîye yê Dêrsimî û CÎKî  çalakîyêk ameye viraştene. Çalakîye de tecrîd, hêrişê dewleta tirkî yê vera Rojawanî û qerarê Amerîka ameyî şermezarkerdene.

Bajarê Stuttgartî de zî bi heman waştişî bi seyan kesî ameyî têhet. Çalakwanan bi kiriştişê posteranê Ocalanî rayîrraşîyayîşêk viraşt û azadîya Ocalanî û wedartişê qedexeyê serê PKKyî waştî.

Hamburg de zî kurdîstanijan verê parlamento ra heta verê konsolosxaneyê Amerîka rayîrraşîyayîşêk viraşt. Bajaranê Bremen û Kielî ra zî kurdî tewrê çalakîye bîyî. Çalakwanan bi sloganan tecrîd, hêrişê dewleta tirkî û qerarê Amerîka rê hêrsê xo ard ziwan.

Munster de zî rayberîya Têgêrayîşê Ciwanên Şorişgêrî de bi rayîrraşîyayîşêk serragêrayîşê 40. ê PKKyî ame pîrozkerdene. Bi seyan ciwanî tewrê çalakîye bîyî û azadîya Ocalanî waşte.

Bajarê Floransa yê Îtalya de zî bi hezaran kesan qerarê Amerîka şermezar kerd. Çalakîya ke grûbanê sosyalîst, demokrat û anarşîstan pîya organîze kerde verê sersefîrîya Amerîka de ameye viraştene. Çalakwanan sloganê PKK û Ocalanî eştî û qiseykerdişan de waşt ke wa Amerîka qerarê xo pey ser bianco.