Ewropa de vera tecrîdê serê Ocalanî û paştdayîşê grevê vêşanîye çalakîyê Kurdistanijan dewam kenê.

Bordeaux

Bajarê Bordeauxî yê Fransa de Kurdistanijî seba ke bale biancê serê xoverdayîşê grevê vêşanîye yê vera tecrîdî çalakîyêka bêvenge viraşte. Girse Stalîngrad de ame têhet, vilawekî vila kerdî û rayapêroyîye derheqê babete de haydar kerde. Peynîya çalakîye de seba aktîvîteya ke roja Çarşeme do bêro viraştene vengdayîşê tewrbîyayîşî ame kerdene. 

Saarbrucken

Bajarê Saarbruckenî yê Almanya de, bêvengîya vera grevê vêşanîye ameye şermezarkerdene.  Girse vernîya Europa Galerî de ame têhet, seba ke bale bianco serê xoverdayîşê grevê vêşanîye êlegê sipîyî dayî xo ra û derheqê grevê vêşanîye de pankartî akerdî.  Çalakîye de xeylî vilawekî ameyî vilakerdene, Hemserekê NCDK'yî yê Saarbruckenî Dexîl Îbrahîmî qisey kerd û bêvengîya rayapêroyî ya Almanî şermezar kerde û vat, “Seba ke vengê ma biheşnê ganî her wareyê Kurdistanî de çalakî bêrê viraştene.” Çalakîye de slogananê “Bicîwîyo Serek Apo”, “Bê Serekî cuya nêbena” ameyî qîrîyayene.

Toulouse

Bi eynî amancî bajarê Toulouse yê Fransa de çalakîyêk ameye viraştene. Girse vernîya meydanê Saînt-Cyprîenî de ame têhet, tecrîdkerdişê Ocalanî şermezar kerd û waşt, na bêvengîye êdî bêra caverdayene.

Sandviken

Bajarê Sandvîkenî yê Swêdî de, bi serkêşîya Meclîsê Şarî yê Gavleborgî çalakîyêk ameye viraştene û bêvengîya vera grevê vêşanîye ameye şermezarkerdene. Girse saete 17.00 de merkezê bajarî de ame têhet û sloganê “Waştişê Leyla waştişê ma yê”, “Ocalanî rê azadîye, Kurdistanî rê statû”, “Tûrîzmê Tirkîya boykot bike" ameyî qîrîyayene. Bi nameyê komuna Sandvîkenî Naîm Serhadî silam da girseyî û vat, “Seba wedaritişê tecrîdî nika 7 hezar merdimî grevê vêşanîye de yê, labelê Yewîya Ewropa (YE), CPT û Swêd bêveng ê. Hîna ke xebera xirabine nêameya girewtene, ma wazenê merdimî nê serebutî bivînê.” Çalakîye bi qîrayîşê sloganan qedîyaye.

Amsterdam

Bajarê Amsterdamî yê Hollanda de, bêvengîya vera grevê vêşanîye bi çalakîyêk ameye şermezarkerdene. Girseyî Waterloopleînî ra heta Museîmpleînî rayraşîyayîşêk viraşt. Endamaê rêxistinanê çepan ê Tirkîya û Êlegçeqerê Holandaijî zî tewrê çalakîye bîyî û paştdayîş da Kurdistanijan. Çalakîye Museîmpleîn de bi mîtîngêk qedîyaye.