Ewropa de tecrîd û hêrişê dewleta tirkî ameyî protestokerdene

Vera tecrîdê serê Rayberê Şarê Kurdî Abdullah Ocalanî û hêrişê dewleta tirkî yê serê Mexmûr û Şengalî Ewropa de çalakîyî dewam kenî.

Xeylî bajaranê Ewropa de tecrîdê serê Ocalanî û hêrişê dewleta tirkî yê serê Mexmûr û Şengalî ameyî protestokerdene.

RENNES

Bajarê Rennesî yê Fransa de Kurdistanijî o dostê înan hemverê tecrîd û hêrişê serê Mexmûr û Şengalî de kuçeyan de bî. Çalakwanê grevê vêşanîye zî tewrê çalakîye bîyî. Çalakîye de hêrişî ameyî şermezarkerdene û xoverdayîşê Leyla Guvene ame silamkerdene.

SAARBRUCKEN

Bajarê Saarbruckenî yê Almanya de zî bi heman waştişî Kurdistanijî kuçeyan de bî. Çalakîye de bi nameyê Partîya Çepî yê Almanya parlamenter Thomas Lutzeyî qisey kerd. Lutzeyî qedexeyê PKKyî rexne kerd, Guvene silam kerde û vat ke bê grevê vêşanîye yewna rayeyê kurdan nêmendo.

FRANKFURT

Bajarê Frankfurtî yê Almanya de zî hêrişê dewleta tirkî ameyî protestokerdene. Grevê vêşanîye yê Frankfurtî bi mîtîngêk qedîya. Mainz, Gissen, Offenbach û Hanau ra bi seyan kesî tewrê çalakîye bîyî. Bi nameyê çalakwanan Mehmet Emîn Yildizî hêrişê dewleta tirkî rê hêrsê xo ard ziwan û vat ke waştişê Guvene waştişê ma yo.

HANNOVER

Hanover de zî bi çalakîyêk hêrişê dewleta tirkî ameyî protestokerdene. Çalakwanan bêvengîya Ewropa zî şermezar kerde. Qiseykerdişan de ame vatene ke ganî vera hêrişanê Tirkîya şarê kurdî wirzo lingan ser.

OLDENBURG

Bajarê Oldenburgî yê Almanya de zî vera hêrişanê dewleta tirkî Kurdistanijî û dostê înan pay ra bî. Çalakwanan bi slogananê ‘Erdogano kiştox‘ û ‘Bicuyo yewîya Kurdan‘ hêrişê dewleta tirkî protesto kerdî.

TORÎNO

Bajarê Torîno yê Îtalya de zî bi çalakîyêk hêrişê dewleta tirkî yê serê Mexmûr û Şengalî ameyî protestokerdene. Çalakwanan posterê Rayberê Şarê Kurdî Abdullah Ocalanî û beyreqê PKK, YPG û YPJyî kiriştî û bi sloganan hêrişê serê Kurdan û paştîdayîşê Ewropa yê Tirkîya protesto kerdî.