Paytextê Almanya Berlîn de, şaristananê Aurîch û Munîhî de û paytextê Japonya Tokyo de Newroze bi hawayêkê kîtlekîyî amî pîrozkerdene.

BERLÎN

Paytextê Almanya Berlîn de bi tewrbîyayîşê 2000 kesan Newroze amî pîrozkerdene. Newroze hetê 13 sazîyanê Kurdistanîyan ê ke mîyanê înan de YNK, NAVDEM, GORAN, Partîya Komunîste ya Kurdistanî, Kurdistan Zentrum, Meclîsê Cinîyan ê DEST DAN’î, ÇEPO ZERGÛN, Dîe Lînke û Cimatê Kurdan ê Berlîn Brandenburgî zî estbî bi hawayêkê hemparî amî organîzekerdene. Pîrozkerdişê Newroze sere de Leyla Guvene, êyê ke tecrîdê serê Rayberê Şarê Kurdî Abdullah Ocalanî de xover danê hemeyê înan rê ame îtxafkerdene.

Pîrozkerdişo ke bi marşê Ey Reqîbî û rêzgirewtişî dest pêkerd de parlamentero verên ê HDP’yî Hasîp Kaplan, parlamenterê Partîya Çepe ya Almanan (Dîe Lînke) Hakan Taş û serekê Cimatê Kurdan ê Berlîn Brandenburgî Huseyîn Taşanî qiseykerdişêk kerd.Pîrozkerdiş de Pinar Aydinlare, Koma Sîlbûs û Tarî, Koma Govend a Faraşînî, Koma Zarokên Rojê, Îbrahîm Kurdî, Salih Hajî, Dilo Doxan û grûba Mozaîkî sehne de ca girewt. Pîrozkerdiş bi slogananê “Biciwîyo Serek Apo”, “Cinî, Cuye, Azadîye”, “Biciwîyo Kurd û Kurdistan”, “Biciwîyo xoverdayîşê Leyla” û “Biciwîyo xoverdayîşê zîndanan” şan de saet 19.00 de qedîya.

AURÎCH

Şaristanê Aurîch ê Almanya de Newroze amî pîrozkerdene. Pîrozkerdişo ke bi deqeyêka rêzgirewtişî dest pêkerde de qiseykerdişê akerdişî hetê hemserekê Meclîsê Şarî Faysal Botanî ra ame kerdene. Botanî bale ante muhîmîya Newroze ya tarîxê Kurdan û xoverdayoxê grevê vêşanîye silam kerdî. Pîrozkerdişî de dimayê qiseykerdişan ra Hozan Xemgîn Bîrhat, Bengî Agirî û Koma Rojava sehne de ca girewt. Hemserekê NAV-DEM’î Tahîr Koçero ke pîrozkerdişî de qiseykerdişêk kerd nê vatî: “Şaro Kurd kewto prosesêkê neweyî mîyan û nika ganî her wextî ra hîna zaf mucadeleyî rê paştî bidîyo. Nika û bêvindertiş ganî tewrê çalakîyan bibê.” Qiseykerdişo ke bi nameyê Meclîsê Cinîyan ê Aurîchî ame kerdene de zî ame vatene ke ganî cinîyî paştî bidê nê mucadeleyî. Pîrozkerdiş bi deyîranê Hadî Şengalîyî û govendan qedîya.

MUNÎH

Şaristanê Munîhî yê Almanya de zî bi organîzekerdişê şewêk Newroze amî organîzekerdene.

TOKYO

Paytextê Japonya Tokyo de zî Newroze amî pîrozkerdene.Pîrozkerdişê Newroze ke hetê Komela Kulturî ya Kurdan ê Japonya ra ame organîzekerdene, parkê Saîtama Akîgase de ame viraştene. Saetanê Sibayî de şaristananê sey Chîba, Kawaguchî û Warabî ra Kurdî ameyî meydanê Newroze. Kîşta Kurdan de Japonî zî bi hawayêkê kesifî tewrê ci bîyî. Pîrozkerdişo ke bi Kurdkî û Japonkî ameyî kerdene rê sîyasetmedaro Kurd Salîh Muslîmî zî bi hawayêkê dîmenkîyî tewrê ci bi û qisey kerd.