Îdarekarê verênî yê MÎTî Mehmet Eymurî kanala televîzyonî T24 de Gokçer Tahîncîogluyî rê qisey kerd. Eymurî beşê diyînî yê bernameyî de îtîrafanê xo rê dewam kerd.

Eymurî îşkence pawit û vat: ''Ma de îşkenceyê kuwayîş û ceyrandayîşî estbîyî. Mi zî zaf îşkence kerd, ez tira poşman nîya.''

Bername de ame vîrvistene ke Hanefî Avci îşkenceyanê xo ra 'poşman' o. Eymurî ney ser o wina vat: ''Avciyî xeylêk kurdê ke poşmanîye ra îstîfade kerd şuxilnayî. Teberê welatî de wina yew wezîfeyê polîsan çin o. Avciyî xîret kerd ke vera PKKyî rêxistinîye awan bikerê. Armancê ci kiştişê ronayoxanê PKKyî bi. Ey semedê Ocalanî ekîpêke şawite. La ekîpe nêeşkaye çîyêk bikera û agêraye.''

Eymurî derheqê operasyonê suîkastî yê vera Rayberê Şarê Kurdî Abdullah Ocalanî de wina vat:

''Ma her cayî ra ameyî astengkerdene. Çevîk Bîr o çax serê îstîxbaratî de bi. MA tonêk teqaber girewt. Roja bîne rojnemeyê Cumhurîyetî de nuşteyêkî wina vatêne 'MÎT do nê tebaweran se bikero?' Ma serekkomarî ra, sîyasetmedaran ra destûr girewt. Xora bêdestûr nêbeno. Serekê Pawitişî û serekkomarî destûr dabi ci. Ma nînan rê agahîyê destê xo pare kerdî, qala xebatanê xo kerde. Înan vat he ma zî dewam kerd. Ekîpêke hol bîye. Tede Yeşîl, leşkerî, wezîfedarê fermî yê nimiteyî estbîyî. A raşte operasyon xirab nêbi. Ma nêeşkayî Apo bikişê la ma teqayîşêko winasên kerd ke pêro Sûrîye tersaye.''

Eymurî da zanayene ke ey operasyonanê vera Ulaş Bardakçi û Mahîr Çayanî de ca girewtbi û înfazê înan pawit. Eymurî îşkenceyê Koşkê Zîverbeyî zî qebul kerdî û vat: ''Îşkence îmkanêk o. Çunke tay kesî zaf înad ê. Nêbo qisey nêkerdêne.''

Eymurî îfade kerd ke îşkenceyê giranêrî zî ameyî kerdene, nê îşkenceyan de 'mergî' zî qewimîyayî. Eymurî pare kerd ke înan Alaattîn Çakici operasyonê vera PKKyî de Almanya de şuxilna.

Eymurî vat: ''Mi waştêne Çakici Amerîka de wa bêro tepiştene. Ma Çakici têna yew operasyonî de Almanya de şuxilna. No operasyon vera PKKyî bi. No operasyon zî serkewte nêbi.''

Eymurî eşkera kerd ke Ergenekon mîyan awanîya ke serê ci de Dogu Perînçek estbî vejîyayo û vat: ''Ê dokumentî masaya ci ra vejîyayî. Ey zaf zerar da Tirkîya. Mi çend reyî tv de vat 'Hîram Abas to kişt.' La dozgerêkî zî çîyêk nêkerd. Eqsê ci ey ez dewa kerda. Velî Kuçuk zî mîyanê nê karî de bi. Kuçuk û Perînçek meraqdarê nê karan ê. Mi Zekerîya Ozî reyde qisey kerd. Mi çi zanayêne tira vat.''