Vervatoxê Merkezê Koordînasyon û Teqîbê Weçînayîşan ê HDPyî Mehmet Ruştu Tîryakîyî derheqê hûmaritişê rayan de merkezê partîya xo de kombîyayîşê çapemenîye kerd.

Qiseykerdişê Tîryakîyî ra tay noqtayê girîngî wina yê:

''Ma Colemêrg de 3 wekîlîyî zî girewtî la naye ser o tay îtîrazî est ê. Xora her kes eşkeno îtîraz bikero la Colemêrg de çîyo xerîb est o. Namzedê AKPyî yê Colemêrgî pê çimeyanê qeymeqam, walî û îdarekaranê dewlete kenê ke rayanê ma, destî ra bigêrê. Ma Walîyê Colemêrgî hişyar kenê ke şima serekê AKPyî nîyê, coka wina têmegêrê. 

Erzirom de zî goreyê doneyanê YSKyî Merale Daniş Beştaş sey wekîle ameya weçînayene. La MHP û mutefîqanê Îtîfaqê Miletî ra yew kenê ke netîceyanê weçînayîşî bivurnê. Ma tedbîrê xo girewtî. MA do nêverdê ke çew rayanê ma bidizno. 

Tay cayan de rayê ma sîstemî rê nêameyê qeydkerdene, nika ma nînan teqîb kenê û qeyd kenê.  Mîsal qezaya Bismilî ya Amedî de çîyo winayên qewimîyayo û rayê ma MHPyî rê nusîyayê. Ma vera ney îtîraz kerd. Sere de Erzirom û Colemêrg ma qet yew ca de nêverdê ke rayî bidizîyê. Ma heta peynî xo ver danê.

Ma do 13.00 de kombîyayîşê Heyetê Rayberdişê Merkezî bikerê, netîceyanê weçînayîşan ser o nîqaşan bikerê. ''