Qezayanê Nisêbîn û Qoserî yê Mêrdînî de serê sibayî polîs û leşkeran eşt zaf adresan ser. Taxa Menderê ya Nisêbînî de Hemsereko verên ê HDPyî yê Nisêbînî Şîyar Koç, muxtarê taxe Farîs Alak û Firat Demîr ameyî destbendkerdene.

Qoser de Hemsereko verên ê DBPyî yê Qoserî Mahmut Damar, Metîn Yilmaz û Samî Îldem bi îdîaya 'hetkarîya rêxistine' ameyî destbendkerdene.

Çarçewa tehqîqatê Serdozgerîya Komare ya Mersînî de Mersîn, Anqara, Antalya, Adana û Îzmîr de polîsan eşt 28 adresan ser. Sereştişan de îdarekarê DBP û TUAY-DERî, merdimê tepişteyan bi îdîaya 'propagandaya rêxistine' û 'hetkarîya tepişteyan' ameyî destbendkerdene. Polîsan eşt bînaya TUAY-DERî ya Çukurova ser zî û bîna de cigêrayîşî dewam kenê. Nameyê tay destbendkerdeyan wina yê: Îdarekarê TUAY-DERî Selîm Ekîcî û Endamê DBPyî Cengîz Dere û Kadrî Ezer.

Îzmîr de muxabîra Ajansê Mezopotamya (MA) Delale Akyuz ameye destbendkerdene û ameye berdene bi Mudirîya Asayîşî ya Îzmîrî.