Wekîla Partîya Çep a Keske ya Şirnexî Newroze Uysal derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Newroze Uysal da zanayene ke tecrîdê Îmraliyî teyna hetê Tirkîya ra hetê hêzanê mîyanneteweyîyan ra zî yeno caardene û vat: ''Tecrîd 24 serrî yo, tecrîdo mutleq 2015î ra nata yeno caardene û 27 mengan ra nata zî Îmraliyî ra xeberêke nêna girewtene.Birêz Ocalanî sîyasetê Tirkîya û polîtîkayanê çareserîye de yew hêzo dîyarker o. Tirkîya de polîtîkayî zî goreyê tecrîdî şiklî gênê. Seba ke paradîgmaya Birêz Ocalanî tesîrê dinya keno, hêzê mîyanneteweyi pê tecrîdî kenê ke verê ey bigêrê. No tecrîd huqûqî ney polîtîk o. Qedexeyê pêvînayîşî bi temamî sey şantajê polîtîkî şuxilîyenê. Reyna xîret yeno kerdene ke pê tecrîdî sîyasetê Tirkîya dîzayn bibo. Goreyê ney ganî vera tecrîdî têkoşîn bêro kerdene.''

Uysale bale ante ser ke Abdullah Ocalan vera-vera pê felsefe û paradîgmaya xo serê dinya de vila beno û şinasîyeno. Uysale ard ziwan ke her ke tesîrê Ocalanî serê dinya de zêdîyeno tecrîd zî hîna giran yeno kerdene. 

Uysale dîyar kerd ke vera Rayberê Şarê Kurdî 'huqûqêko taybet' yeno caardene û vat: ''Seba tecrîdkerdişê Birêz Ocalanî qanûnê taybetî yenê vetene û Qanûnê Înfazî yeno vurnayene. Vera nînan ganî ma têkoşînê huqûqî zî bikerê. Girawa Îmraliyî de huqûq yeno binpaykerdene. Ê kesê ke Qanûnê Bingeyî yê neweyî wazenê, huqûqê têdûşt û edîlî wazenê ganî hêverî vera tecrîdê Îmraliyî vejîyê. Eke Îmrali de huqûq bêro caardene o çax Tirkîya de vurîyayîş beno mumkîn.''