Tirkîya û Vakurê Kurdistanî de raydayoxan seba îdareyanê cayîyan ê ke do 5 serrî wezîfeyî ser o bê 194 hezarî û 390 sindoqan de rayê xo dayî. 30 bajaranê pîlan, 51 bajaran, 519 qezayanê bajaranê pîlan, 403 qezayan û 386 bajarekan de pêro pîya hezar û 389 şaredar/hemşaredaran û heman wextî de 50 hezarî û 236 keyayî ameyî weçînitene.

Îqtîdarê AKP-MHP’yî heme îmkanê dewlete şuxulnayî û şîdet bica ard ke seba îdareyanê cayîyan de rejîmê yewperwerî rono û xo goreyê nê ra amade kerd. HDP’yî seba ke peynîya rejîmê qeyûmî bêro û faşîzmê AKP-MHP’yî bin fîno stratejîyêka taybete daye xo ver. Hemverê zext, zordarî, sansur û operasyonanê qirkerdişê sîyasîyî yê vere weçînitişan şaranê Tirkîya û Vakurê Kurdistanî umîdê xo pawit û şîyî sere sindoqan.      

Goreyê netîceyanê ke fermî nêyê, stratejîya HDP’yî û fehmê weçînitoxan pê kerd. Rixmo ke HDP nêeşka bajaranê sey Şirnex, Dêrsim û Riha de konseptê taybetî ê bi zorê leşkeran ame rayraberdene raste ra wedaro zî ‘rejîmê qeyûmî’ bi eşkerayî bin fîna, bajaranê bewlîkerdoxan ê Tirkîya de zî peynîya îqtîdarê AKP-MHP’yî arde.

Bi qerarnameyê hukmê qanûnî de ke 11’ê Êlule 2016 de amebi vetene 95 şaredarîyê DBP’yî ke 3’yê înan şaredarîyê bajarê girdî bî, 10 bajarî, 63 qeza û 22 bajarekî bi rayîrê qeyûman hetê rejîmê AKP’yî ra dest nîya înan ser.

Bi deste qeyûman huqûqê kolonyalîzmî Kurdistan de ame rayraberdene. Hetêkê stratejîya HDP’yî qedînayîşê rejîmê qeyûmî bi û vêşîkerdişê humara şaredarîyanê xo bi. HDP’yî bi nê amacî Tifaqê Kurdistanî awan kerd. Netîce de Şaredarîya Bajarê Girdî ya Amedî û qezayê ke qeyûmî ameybî tayînkerdene, Şaredarîyê Bajarê Girdî yê Mêrdîn û Wanî zî tede HDP’yî tayê şaredarîyê ke destê AKP-MHP’yî de bî zî bi dest fînayî. Zafê şaredarîyanê bajaranê Kurdan bi dest fînayî. Bajaranê sey Şirnex û Dêrsimî ke bi demografîya înan ameya kaykerdene û bicaardişê taybetî ser o estbî, HDP’yî netîceyo ke waştêne bi dest nêfîna. Bi heman rayîr û metodî merkeze Çewlîg, Bedlîs, Agirî û Riha û qezayê ci zî ameyî destserdayene.   

AKP Û MHP Metropolan De Ameyî Binfînayene

Linga dîyine ya stratejîya weçînitişî ya HDP’yî zî sere de metropolî tayê bajaranê Tirkîya de binfînayîşê AKP-MHP’yî bi. Na stratejî û fehmê şarê Kurdî ê ke bajaranê Tirkîya de bî resa netîceyêkê muhîmî. Goreyê netîceyanê heta saet 24:00 ê vizêr şewe, sere de metropolê sey Enqere, Îzmîr, Adana, Mersîn, Antalya û Stenbol bi desan bajar û qezayan de namzede ke HDP’yî paştî dabî înan bi ser kewtî. AKP’yî paytextê Tirkîya Enqere de ke çimeyo bingeyên ê îqtîdarê ci yo û 20 serrî ra nizdê 20 serrî yo deste ci de yo û Stenbol de vîndî kerd.  

Mucdele Û Xoverdayîş Do Dewam Bikero

No netîce di alternatîfan dano vernîya îqtîdarê Tirkî. Eşkeno konseptê şerî yo ke mewcûd o de israr bikero, la hem xoverdayîşê Kurdan hem zî netîceyê weçînitişî ramojnenê ke no meqûl nêyo. Beno ke hendî nêeşko tifaqo ke MHP û Ergenekonî dir viraşto hîna zede bido dewamkerdene. Ya dîyine zî eşkeno konseptê şerî yo ke dişminîya Kurdan ser o awan kerdo ra fek vera bido, do no binkewtişê ê hîna bikero nerm. HDP û leteyê ci zî do na hemleya xoverdayîşî ya Kurdan a mewcûde goreyê nê netîceyan newe ra biercnê û xo seba dewrê neweyî amade bikerê. Hendî vernîya înan de blokêka îqtîdarî esta ke per û baskê aye şikîyayê.