Rojnameyanê popolaran ê Almanya ra Frankfurter Allgemeine Zeitung (FAZ) derheqê Qirkerdişê Parisî yê 23yê Kanûne de xeber-nuşteyêkê ercnayîşî weşana.

Nuşte hetê muxabîra Parisî Michaela Wiegel ra nusîya û tede ercnayîşê selahîyetdaranê kurdan ê Fransa est ê. Xbere de yeno vatene ke kurdî mabênê Qirkerdişê 9ê Çeleyê 2013î û Qirkerdişê 23yê Kanûne de yew eleqe vînenê.

Xebere de yeno parekerdene ke kurdî wina fikirîyenê ke 'dewleta Fransa înan nêpawena.' Xebere de wina yeno vatene: ''Fransa de mîyanê kurdan de vera dewlete nebawerîyêka pîle qewimîyena. Çunke rixmo ke 10 serrî xo pey de verdayî hema zî cînayetê Sakîne Cansiz, Fîdane Dogan û Leyla Şaylemez nêame roşnîkerdene. Îdîanameyê dozgerîye de amebi îfadekerdene ke îstîxbaratê tirkan zî nê cînayetan de cagirewto û îdîaname ser o astengîya sirê dewlete est o. Kurdî wazenê wa na astengîye bêra wedaritene.''

Xebere de ca dîya cuya Emîne Kara (Evîne Goyî) û wina ame vatene: ''Aye têkoşînê vera DAÎŞî de fermandarîya hêzanê kurdan kerde û dima ke nê prosesî de birîndar bîye, Fransa rê muracatê bextwaştişî kerd. A serkêşanê têgêrayîşê cinîyan ê kurdan ra yewe bîye ke no têgêrayîş bi sloganê 'jin, jiyan, azadî' alawîyayo.''