Federasyonê Elewîyanê Demokratîkan (FEDA) eşkerayîyêka nuştekîye daye û vat: ''Ma pêro gananê ke xoverdayîşê Hz. Huseyînî xo rê kenê rayber û mazluman hetî de vindenê, bi rêzdarî selam kenê.''

Eşkerayîye wina dewam kena: ''Feraseto ewroyîno ke hêrişê elewîyan keno, komelî xapîneno, bawerî, ziwan û kulturê ma înkar keno elewîyan û kurdan rê qirkerdiş ferz keno. Wayîrvejîyayîşê ziwan, nasname, kultur û bawerîye yeno manaya wayîrvejîyayîşê tewirê Huseynîyî. Vera şer û qirkerişanê nikayênan eke ma xoverdayîşê Huseynîyî geş bikerê ma do cuya azade û hempare zî awan bikerê.

Rayîro ke elewîyî layîqê tewirê Huseynîyî bibê, têkoşînê vera Yezîtan ra derbaz beno. Mîsyono tarîxî yê Rojeyê Muharemî no yo ke vera ferasetê neheqî yê AKP-MHPyî ma rixmê hêzanê demokrasî têkoşînê hemparî bikerê. Elewîyî sere de ma venga pêro kesanê heqwaştox û edaletwaştoxan danê ke wa dormeyê têkoşînê demokrasî de kom bibê.''