Federasyonê Elewîyan ê Demokratîkan (FEDA) bi eşkerayîyêke Huseyîn Narli yad kerd.

Eşkerayîya FEDA bi kilmî wina ya:

''Ma zaf xemgîn ê ke canê ma Huseyîn Narli (Okkeş Unlubayir) şîyo heqîya xo. Ma verê vîrameyîşê ci de bi rêzî rîyê xo anê war û sere de keyeyê Narliyî rê pêro kurdan, elewîyan û sosyalîstan rê serweşîye wazenê.

Bi prosesê Yewîya Elewîyan a Kurdîstanî Huseyîn Narli tewrê karê bawerîya Raya Heqîye bi, kovara Zulfîkarî de komelkîkerdişê erjanê bawerîya elewîyan de xizmetê qîmetîn û girîngî kerdî. Hetê bînî ra ey Federasyonê Elewîyanê Kurdîstanî (FED) de ca girewt u bi sereko verên ê federasyonî.

Huseyîn Narli bi rojnamegerî û nuştoxîya xo têkoşînê heqê demokratîkî yê neteweya kurdan û cigêrayîşê heq û bawerîye yê elewîyan de kedêka pîle daye û tarîxê xo teqîb kerd.''