Şaristanê Ludwigsburgî yê Almanya de hêrişê vera goranê elewîyan ame kerdene. Înanê ke find û sembolê goran şiknayî û vetî, roja pancşemeyî zî  hêrişê 3 cinîyan kerd ke Goristanê Ostî zîyaret kerdêne. Hêrişkeran erjanê elewîyan rê heqaret kerd. Ame zanayene ke verê cû zî vera elewîyan heqaretê winasênî ameyî kerdene. 

Federasyonê Elewîyan ê Demokratîkan (FEDA) derheqê hêrişî de eşkerayîye daye.

Eşkerayîye de wina ame vatene: ''Zorbazê ke erdê ma de heqê ciwîyayîşî nêda ma, pê hêrişê vera goran zîret kenê ke ma bitersnê. Êyê ke hêrişê goran kenê, goran talan kenê wa xo vîr a nêkerê ke ma do goranê xo zîyaret bikerê û destûr nêdê ke nê hêzî ser bikewê.''