Federasyonê Elewîyan ê Demokratîkan (FEDA) bi wesîleya menga Muharemî eşkerayîyêke daye

FEDA vist vîrî ke dima ke Kerbela de Hz. Huseyîn û şagîrtê ci ameybî qetilkerdene elewîyî vera nê zulmî her serre 12 rojan Rojeyê Muharemî gênê ke sey rojeyê şînî zî şinasîyeno. FEDA vat: ''Heta ke Yezîd û zalimî est bê Huseyînî do est bê.''

FEDA eşkera kerd ke ewro elewîyî maruzê qirkerdişê kulturî yê hişmendîya Yezîdî manenê. FEDA vat: ''Elewîyê ke têkoşînê vera Qirkerdişanê Koçgirî, Dêrsim, Mereş, Çorum, Sêwas, Gazî, Roboskî, Gezî, Pirsûs û Anqara kenê, mecbur ê ke wayîrê tewirê Huseyînî bibê. Êyê ke dewanê ma de camîyan virazenê, kursê Quranî akenê, Pîranê ma rê vanê 'dede', 400 pîran benê Kerbela, wazenê ciwananê elewîyan bikerê selefîst, domananê ma rê dersa dînî ferz kenê, cemxaneyan rê statu nêdanê û ci rê vanê cumbuşxane wayîrê hişmendîya Yezîdî yê.

Ganî ma vera qirkerdişê kulturî mîyanê xoverdayîşî de bibê. Ma do bi wesîleya Muharemî loqmayanê xo bar bikerê, germîya îmaman vila bikerê. Ma venga pêro elewîyan danê ke bi na wesîle bibê yew û pîya têbigêrê.''