Ferhengekê sîyaset û dîplomasî yo bi kirdkî/zazakî yo ke hetê Esat Şanliyî ra ame hazirkerdene, sey PDFyî ame weşanayene.

Esat Şanliyî hesabê xo yê medyaya sanale ra da pêhesnayene ke ey bi kirdkî, tirkî û îngîlîzkî ferhengek hazir kerd ke xebata ci serrêke kerd derg û linkê ci pare kerd.

Destpêkê ferhengekî de nê ameyî parekerdene:

Merheba, wendoxê ercayeyî!

Seke zanîyeno vêşîya berhemanê nûştekîyan ê ziwanêk sey nîşaneyêkê hêzdar û dewlemendbiyayîşê ê ziwanî hesebîyena. Kurdkîya Zazakîya ke nîmeyê seserra newyesine ra tepîya berhemanê nûştekîyan de ca girewta, ewro biya wayîrê bi hezaran berhemanê nûştekîyan. Her çende enê vîst serranê peyênan de humara kitaban ê enê ziwanî de vêşîbiyayîşêko muhîm biyero muşahedekerdene zî tayê wareyan de hewna zî talîyêka (vengayîyêka) pîle tecrube keno ke ganî biyero pirîkerdene. Enê wareyan ra yew zî sîyaset o ke cuya ma ya rocaneye ser o wayîrê tesîrêkê zaf pîlî yo. Ena xebate, cehdêkê pirîkerdişê talîya enê wareyî ya. Helbet rixmê çimraravêrişan de beno ke tayê kemasî yan zî xetayê ci estbê. Umîd kena ke do ameyox de wareyê sîyaset û dîplomasî de bi Zazakî xebatê rind û hîrayêrî biyerê kerdene û korpusê (kullîyatê) ziwanî yo sîyasî bibo dewlemendêr.

Wendişo weş!