Festîvala Kulturê Dêrsimî ya 13ine bajarê Frankfurtî yê Almanya de bi slogana 'Paştdayîş dano ciwîyayene' ameye kerdene.

Festîvale bi panelî dest pêkerde û dima ra bi programê sehneyî dewam kerde. Rojnamegere Merale Ozel bi kirmanckî û Şaîr Guney Ozdemîr zî bi kurmanckî program pêşkeş kerd. Program bi gulbangî ame destpêkerdene. Gulbang hetê Pîr Riza Yaxmur û Didar Ana ra ame kerdene.

Dima ra Enama Meclîsê Fedaralî yê SPDyî Kaweh Mansourî şar silam kerd û qisey kerd. Dima Hozan Rencberî kirmanckî deyîş û kilamî, Grûba Muzîkî ya Umuda Haykiriş zî bi tirkî û kurdkî deyîrî vatî. Hemserekê FEDA Demîr Çelîk, Hemsereka Kongreya Înşa ya Dêrsimî Hulya Yer û Serekê Federasyonê Yewîyanê Demokratîkan ê Dêrsimî yê Ewropa Muharrem Erdogan vejîyayî sehne û qisey kerd.

Endama Meclîsê Fedaralî ya Almanya ya Die Linke Gukah Akbulut zî festîvale de qisey kerd û vat zaf muhîm o ke Dêrsim ziwan, tarîx û kulturê o tîya de dano ciwîyayene. Parlamentera Partîya Çep a Keske ya Dêrsimî Aytene Kordu zî mesajêk şawit festîvale. Badê wendişê mesajê Kordu festîvale bi deyîranê Ayfere Duzdaş dewam kerde.

Dima ra Hemserekê Federasyonê Yewîyayenê Elewîyan yê Ewropa Huseyîn Mat vejîya sehne. Matî weçînitişê sibayî nîşan da û vat do îradeyê şaran o ke azadîye wazeno do ser bikewo. Badê qiseykerdişê Matî govendê grûba KAGEFî ameyî girewtene û dima ra mesajê ADKHyî ame wendene. 

Bi rêzî Grûp Munzur, Ferhat Tunç, Hasan Saglam û Hozan Serdar vejîyayî sehne û bi deyîran û govende festîvale dewam kerde. Reyna Grûbê Tîyatroyî ya Arêyê Kayî kayêk kay kerd û eserê Serpîle Odabaşi ameyî mojnayene û xeylêk nuştoxî zî wendoxanê xo reyde ameyî têhet. Qezencê festîvale do mexdûranê erdlerzî rê bêro şawitene.