Wezîrîya Karanê Zereyî serê sibayî qeyûm tayînê Şaredarîya Mêrdînî kerd. Polîsan bînaya şaredarîye girewte binê ablûqa. 

Êlih de zî bînaya şaredarîye binê ablûqa de ya.

Qezaya Xelfetî ya Riha de zî serê sibayî bînaya şaredarîye gêrîyaye binê ablûqa. Hemşaredar Mehmet Karayilan ame destbendkerdene.

Hemşaredarê Mêrdînî Ahmet Turkî hesabê xo yê medyaya dîjîtale de vat: ''Ma do rayîr nêdê ke îradeyê şarê ma bêro xespkerdene. Heta peynî ma do xo ver bidê.''

Hemşaredara Êlihî Gulîstane Sonuk zî vat: ''Şaredarîya ma bê xebera ma ameya xespkerdene. Ma nê rejîmê talanker û xespkerî qebul nêkenê.Şaredarîyî ê şaran ê.''

Hemşaredarê Xelfetî Mehmet Karayilanî vat: ''Ma do heta peynî vera nê zulmî hetê şarê xo de bibê û wayîrê şaredarîya xo vejîyê.''

Hemşaredara Xelfetî Sanîye Bayram vat: ''Siba weçînayîş bêro kerdene ma do ancî ser bikewê. Ma do tim ser bikewê.''

Wezîrîya Karanê Zereyî dewayê vera hemşaredaran sey sebebê xespkerdişî mojnayî.