Sekretera Pêroyî ya Platformê 'Ma Verê Kişîyayîşê Cinîyan Bigêrê' Fîdane Ataselîm derheqê turê diyînî yê weçînayîşê serekkomarîye de ANFyî rê qisey kerd. 

Fîdane Ataselîm bale ante ser ke partîyê dişmenê cinîyan ê sey HUDA-PAR û Yenîden Refahî hînî Meclîs de yê û coka turo diyîn ê weçînayîşî zaf girîng o. Ataselîme vist vîrî ke Erdogan turê yewinî de nêeşka ser bikewo û vat: ''La weçînayîşê wekîlîye 14ê gulane de qedîyayî. 4 namzedê HUDA-PARî û 5 namzedê Yeniden Refahî lîsteyanê AKPyî ra bîyî wekîl. MHPyî zî mîqtarê rayanê xo zêdînayî. No tablo mojneno ke ma Meclîsê tewr kanwazî de têrî yê.

Eke nê kesî eşkenê pê sozê çinkerdişê heqanê cinîyan rayan bigêrê ganî ma mesele ser o bifikirê. Sebebê ney o tewr girîng no yo ke îqtîdar polîtîkaya dîşmenîya cinîyan ano ca. Îtîfaqê Cumhurî dişmenîya cinîyan visnaye asta tewr pîle. Êyê ke sebebê kişîyayîşê Konca Kuriş ê, wayîrê hişmendîya qirkerdişê cinîyan ê û wazenê 6284 bêro wedaritene hînî Meclîs de yenê temsîlkerdene.''

Fîdane Ataselîm ard ziwan ke nê çîyan ra turo diyîn ê weçînayîşê serekkomarîye zaf girîng o û vat: ''Se beno wa bibo têkoşînê cinîyan do nêqedo. Belê rewşêka tehlukeyîne est a. Labelê ma eşkenê cayêk de ney vindarnê. Îmkanı tewr girîng destê ma de yo ke ma do nêverdê Erdogan ser bikewo. Ganî ma sîstemê şexsêkî bin bivisnê. Coka ganî cinîyî 28ê gulane de şorê raya xo bidê Kiliçdarogluyî.''