Almanya ra Partîya Keskan, Yunanîstanî ra Syriza, Fîlîpînî ra Partîya Girseyanê Kedkaran, Brezîlya ra Partîya Azadî û Sosyalîzmî, Îngilîstanî ra Înîsîyatîfê Haştîye yê Kurdîstanî, Fasî ra Partîya Sosyalîste ya Yewbîyaye û Komeleya Cinîyan seba HDPyî  mesajê paştdayîşî dayî.

Endamanê Parlamentoya Federale yê Partîya Keskan Claduia Roth û Cem Ozdemîrî eşkerayîyêka hempare daye û seba ke bêveng bibo vera muxalefetê Tirkîya hêrişî yenê kerdene û no çinkerdişê azadîya fikran o. Eşkerayîye de wina ame vatene: ''Operasyonê destbendkerdişî mojnenê ke Erdogan krîterê serdestîya huqûqî binpay kerd. Ganî Almanya hînî nê sîyasetê otokratîkî yê Erdoganî bi xurtî rexne bikera, mehkum bikera û ambargoyê leşkerî û ekonomîkî bîyara ca.Ma do her tim paştî bidê HDP.''

Partîya Girseyanê Kedkaran a Fîlîpînî zî wina destbendkerdişê HDPyîjan şermezar kerd: ''Rejîmê Erdoganî Sûrîye, Rojawan û Iraqî de operasyonanê xo yê leşkerîyan de hetkarîye daye DAÎŞ ke vera kurdan pakîya etnîke bikero. Rejîm nika zî binkewtişê DAÎŞî yê Kobanê gêno. Nê hêrişê vera HDPyî yê ke HDP wazeno kurdî çarenusê xo, bi xo biweçînê.''

Serekîya Dayîreyê Karanê Ewropa û Mîyanneteweyî yê Koalîsyonê Çepî yê Radîkalî (SYRIZA) pare kerd ke vera tedayanê Erdoganî ê paştî danê demokratanê Tirkîya. SYRIZA eşkerayîya xo de ard ziwan ke destbendkerdişê Hemşaredarê Qersî û 82 îdarekar û endamanê HDPyî binpaykerdişê huqûqî yo.  SYRIZA vat: ''Ma bi xurtî paştî danê HDP û hêzanê demokratan ê Tirkîya.''

Partîya Azadî û Sosyalîzmî ya Brezîlya (PSOL) eşkerayîya xo de wina vat: ''Seba demokrasîya Tirkîya, HDPyî rê azadîye. Destbendkerdişê 82 kesanê ke seba demokrasî û têdûştîye têkoşîn kenê, peynîya huqûqî ya. Ma otorîteya rejîmê tirkî şermezar kenê û wazenê nê 82 kesî cade bêrê veradayene. Ma înan reyde yê, têkoşînê ma yew o.''

Înîsîyatîfê Haştîye yê Kurdîstanî yê Îngilîstanî zî pare kerd ke nê operasyonê destbendkerdişî seba çinkerdişê muxalefetê Tirkîya yenê kerdene. Înîsîyatîfî eşkerayîya xo de vat ke  bêvengîya Îngilîstanî û hukmatanê Ewropa cesaret dana Erdogan û veng da ke nê hêrişî bêrê vindartene.

Sekreterê Pêroyî yê Partîya Sosyalîste ya Yewbîyaye ya Fasî Nebîl Munîpî zî selam kerd endam û îdarekaranê HDPyî û paştdayîşê xo yê seba HDPyî pêşkêş kerd.

Sereka Komeleya Cinîyan a Averan a Fasî Suate Brahmî zî hêrişê vera HDPyî şermezar kerdî û da zanayene ke ê bêşert paştî danê HDP. Suate Brahmî vat: ''Ma wazenê şorişgêrê ke ameyê destbendkerdene, cade bêrê veradayene.''