Wekîlê Partîya Çep a Keske yê Îstanbulî û Serekê Heyetê Rayberdişî yê Cemxaneyê Garîp Dedeyî Celal Firatî derheqê Qirkerdişê Sêwasî de ANFyî rê qisey kerd.

Firatî pare kerd ke çîyo ke 2yê temmuza 1993yî de qewimîyayê serê tarîxê Tirkîya de şermêka tarî ya. Firatî vist vîrî ke wextê Terteleyê Dêrsimî de zî kurdê elewîyî sey mesuldarî ameybî girewtene û vat: ''Mereş, Çorum û Sêwas de heman qirkerdiş qewimîya. Eke Komara Tirkîya ra yew vurîyayîş pawîyeno o çax ganî nê kiştoxî bêrê muhakemekerdene. La 30 serrî derbaz bîyî zî merasîmê yadkerdişî yenê qedexekerdene.

Rixmo ke Qirkerdişê Sêwasî 30 serrî xo pey de verdayî hema zî dewlete seba roşnîkerdiş û muhakemekerdişê sûcdaran gamêke nêeşta. Sereka ê çaxî Tansuye Çîller vatbi ke şikir kerdbi ke şarê hêrişkerî ra çîyêk nêbîyo û dima zî cayê qetilkerdişî de kebab amebi kerdene. Sûcdarî remayî şîyî teberê welatî. Vajîyayêne ke sûcdar Cafer Çakmak her ca de yeno gêrayene la o Sêwas de merd. Dewlete mojna ke wayîra qirkeran vejîyena.''

Firatî îfade kerd ke elewîyî bi serran o wazenê ke wa Otêla Madimakî biba muzeya şerme û vat: ''Ma edaletî wazenê la edaletê Yezîdan ney edaletê Pîr Sultanî wazenê. Ganî dewlete elewîyan ra uzrê xo biwaza. Eke wina nêkera ma do tim vajê ke dewlete zulm kerdo û kiştoxan pawena.''