Endamanê Delegasyonê Haştîye yê Îmraliyî yê Mîyanneteweyî Buroyê Huqûqî yê Asrinî zîyaret kerd û derheqê tecrîdê serê Rayberê Şarê Kurdî Abdullah Ocalanî de zanayîş girewt.

Hîrê dewletanê cîyayan ra hîrê kesan sey temsîlkaran delegasyonî de ca girewt. Profosorê Sosyolojî û Antropolojî DenisO’Hearn, hetkara Serekê Grûba Çep a Konseya Ewropa û temsîlkara Meclîsê Parlementeran ê Konseya Ewropa û endama Komîteya Teqîpkerdişî Laura Castel, Wezîro verên ê Edalet û Karanê Zereyî yê Îzlanda Ogmundur Jonasson, 11 û 12 gulane de Îstanbul de sîyasetmerdan, rêxistinanê komelê sîvîlî û huqûqî reyde pêvînayîşan kenê.

Heyetî verê avûkatê Rayberê Şarê Kurdî Abdullah Ocalanî zîyaret kerdî û Razîye Ozturk, Emran Emekçî, Îbrahîm Bilmez û Rezan Sarica reyde pêvînayîş kerd.

Avûkatan ra Bîlmezî wina qisey kerd: “Tecrîdo winayên hema nêameyo vînayene. Tirkîya de huqûq rewna wedarîya yo. Gama ke qala kurdan, Abdullah Ocalan û muxalîfan yena kerdene, huqûq yeno wedaritene. Îmrali de bêhuqûqîye yena kerdene û şarê kurdî yo ke Abdullah Ocalanî sey rayberê xo vîneno, na neheqîye qebul nêkeno. Hetêkî ra wina tecrîdo giran est o hetê bînî ra sîyasetmedarî muwekîlê ma ser o spekulasyon kenê. 25 mengî yo ma muwekîlê xo ra xebere nêgênê. Coka muneqeşeyê sîyasetmedaran etîk nîyê.”
 
Avûkat Saricayî zî wina qisey kerd: “Ewro gama ke weçînitişî rê çend rojî mendî, Îmrali de îşkence est o. Serê ci yeno girewtene. Hetê bînî ra çarçeweya kampanyayanê weçînitişî de serê Abdullah Ocalanî ra sîyaseto bêeheleq yeno kerdene. Xora tewirê CPTyî yê vera tecîrîdî zî 25 serrî yo eynî yo.” 

Avûkatan ra Razîye Ozturk zî muracatê ke înan dezgehanê mîyanneteweyî de kerdî vist vîrî û vat seba ke Tirkîya qeraran nêana ca, gerek dezgehê Ewropa şirê aye ser.

Delegasyonî ra Ogmundur Jonassonî zî vat: “Heta ke Tirkîya endama NATO bo, goş qeraranê Ewropa ya nêkewna. Tirkîya kurdan ra tersena. Coka ma kişta şima û kurdan de yê.” 

Laura Castel zî vat meseleya kurdan bi azadîya Abdullah Ocalanî eşkena bêro çareserkerdene.

Avûkat Emran Ekekçî zî vist vîrî ke Abdullah Ocalan tim rolê xo ano ca û vat coka o tim rixmê heme zextan xover dano.

Avûkatan dima ra raporê binpaykerdişê heqan ê Îmraliyî yê 2022yî da endamanê delegasyonî.