Wekîlê DEM Partî yê Wanî Zulkuf Uçarî derheqê sîstemê tecrîd û îşkenceyî yê Îmraliyî de ANFyî rê qisey kerd.

Uçarî îfade kerd ke dewlete seba ke komel vengê Rayberê Şarê Kurdî Abdullah Ocalanî nêeşnawo ey tecrîd kena û vat: ''Krîterê serwerîya huqûqî hetê dewlete ra yenê binpaykerdene. Goreyê biranê Mehkemeya Heqanê Merdiman a Ewropa (MHME) ganî şertê tepişîyayîşê Abdullah Ocalanî 25 serran ra dima ancî biameyêne ercnayene. La dewlete nê biran nêana ca.''

Uçarî bale ante ser ke cezayê dîsîplînî huqûqî nîyê; bahaneyê tecrîdî yê. Uçarî vat: ''Avûkatê Ocalanî zî nêzanenê ke tedeyîya nê cezayan çita yê, sebeb çî yê. Nê cezayê dîsîplînî manewrayê sîyasîyî yê. Dewlete babeta Îmraliyî de huqûqî nêşinasnena.''

Uçarî vist vîrî ke 4ê nîsane ra nata tepişteyî mehkemeyan boykot kenê, heqê telefonkerdiş û pêvînayîşî nêşuxilnenê. Uçarî vat: ''Dewlete grevê vêşanîye reyde tedaya xo zêdînaya. Bi bahaneya grevî tepişteyan rê cezaya dîsîplînî dîyena. Wayîrvejîyayîşê grevê tepişteyan wayîrvejîyayîşê huqûq û demokrasîyî yo. 

Sîstemê Îmraliyî tesîrê pêro zîndanan keno. Dewlete serranê peyênan de bi hezaran sîyasetmedarê kurdî tepiştî û zîndanan de teda û îşkenceyî zêdînayî. Bi teda û zorbazîye sîstemêkê terbîyekerdişî tepişteyan rê yeno ferzkerdene û bi nê hawayî zî xîret yeno kerdene ke waştişê azadî û têdûştîye rojdemê komelî ra bêrê vetene.''