Xoverdayîşê grevê vêşanîye yê Gallerî ke seba qedînayîşê tecrîdkerdişê Rayberê Şarê Kurdî Abdullah Ocalanî yeno kerdene kewt roja xo ya 71’ine. Îmam Şîş Merkezê Cimatê Kurdî yê bajarê Newportî de grev de yo. Serdanê seba paştîdayîşî zî dewam kenê. Parlamentera partîya Plaîd Cymrû ya Meclîsê Gallerî Deleyth Jewelle pîya bi heyetêk şîye serdana Şîşî û paştî daye ê. Heman wextî de Jewelle mesajê sereko pêroyî yê Plaîd Cymrûyî Adam Prîce zî resna Şîşî.

 ‘MA DO CPT’YÎ RÊ MEKTÛB BINÛSÊ, WA TIRKÎYA SER O ZEXT BIKERÊ’

Delyth Jewelle Merkezê Cimatê Kurdî de wextêko derg Şîşî dir sohbet kerd û derheqê halo peyên ê weşîya xoverdayoxanê grevê vêşanîye yê Kurdistanî û welatanê bînan de hayîdarîyî girewtî. Jewelle vat ke ê do mucadeleyê heqdarî yê şarê Kurdî de tim înan het de bê û seba ke bale biancê nê xoverdayîşî do bikewê tayê cigêrayîşan mîyan. Jewelle da zanayene ke ê do Komîteya Vernîgirewtişê Îşkenceyî (CPT) ya Ewropa rê mektûbêk binûsê û seba ke zext hukmatê Tirkî ser o bikero do mîyanê hukmatê Brîtanya de bikewê mîyanê cigêrayîşan.  

 ‘HETA KE ŞIMA BIRESÊ HEQANÊ XO, MA DO PAŞTÎ BIDÊ ŞIMA’

Mesajê sereko pêroyî yê Plaîd Cymrû Adam Prîceyî ke hetê Jewell era ame resnayene, wina yo: “Bi nameyê endam û îdarekaranê Plaîd Cymrû, ez paştî dana hemeyê şarê Kurdî û hemrayanê xo yê Kurdan ê ke xover danê. Mcuadeleyê şima mucadeleyê ma yo. Mucadeleyê anorî yo, aşitî yo, yê edaletî yo. Seba azadîya şarê xo şima bi bedenê xo xover danê ke na yewe zî pîlîya mucadeleyê şima ramojnena. Heta ke şaro Kurd bireso heqanê xo, ma do nêvinderê û ma do bixebitîyê.”

Prîceyî mesajê xo bi vateyê “Biciwîyo Kurdistan” qedîna.

Mîyanê meymananê Şîşî de Profesore Sûe Wîllîamse zî estbî. Kurdistanijê ke Galler û Brîtanya de ciwîyenê zî Şîşî tena nêverdanê.