Badê pêvînayîşê Rayber Apoyî yê bi wekîlanê DEM Partî Pervîne Buldan û Sirri Sureyya Onderî,  sîyasetmedar Zîya Pir û Nursele Aydogan û akedemîsyen Çetin Gurer û huqûqnase Rengine Ergul ajansê ma rê qisey kerd.

Zîya Pirî bale ante muhîmîya vatişanê Rayber Apoyî ser û nê vatî: ''Eke dewlete û hukmat paştdayîşê paradîgmaya newî ra peyser game meerzê do demo newe dest pêbikero. Ma nê zanê ke prosesê wînayênî spekulasyon, manîpulasyon û şantajan rê akerde yê. Coka ganî muxatabî bi heyetan nê bi xo rî bi rî pêvînayîş bikerî. Senî ke Birêz Erdogan û Bahçelî fîkranê xo şarî vanê ganî wina Birêz Ocalanî rê zî vajî.''

Çetin Gurer ard ziwan ke no pêvînayîş do verê sîyasetî abikero û nê vatî: ''Badê 9 serrran warê sîyasetî de Ocalanî reyde pêvînayîş ame kerdene. Netîceyê pêvînayîşî cade şarî ser o tesîr kerd. Mesajanê Ocalanî warê sîyasetî biney kerd rehet. Reyna qala meseleya kurdan, haştîye û çareserî ame kerdene. No çîyo zaf muhîm û erjîyaye yo. Ganî tecrîd bi temamî bêro wedaritene. Îqtîdar çend qala çareserîye bikero zî heta ke tecrîd nêro wedaritene û perspektîfê çareserîye yê Abdullah Ocalanî nêrê zanayene qiymetê nê eşkerayîyan çîn o.''

Nursele Aydogan zîyaretê DEM Partî yê Îmraliyî zaf muhîm sey çîyo tarîxî hesibna nû wina vat: ''Badê 9 serran heyetê DEM Partî pêvînayîşo verên kerd.  Birêz Ocalanî bi vervînayîşanê xo yê xurtan û heme nîyetê xo yê holî çîyê ke ganî bêrê kerdene vatî. Perspektîfê ci hêvî danê. Ma zî vanê ke 'hêvî serkewtişî ra dahîna erjîyaye ya' û wayîrê nê perspektîfan vejîyenê.''

Rengine Ergul zî bale ante serê tecrîdî ser û nê vatî: ''Ganî huqûqnasî vera tecrîdî dahîna aktîf têkoşîn bikerê. Pêvînayîş gama muhîm a la tecrîd hema dewam keno.  Seba ke tecrîd bêro wedaritene, Birêz Ocalan bibo azad û tepişteyê sîyasîyî bêrê verdayene ganî pawitişo huqûqî bêro xurtkerdene. Reyna sûcê merdimîye ke Rojawan de yenê kerdene ganî ê zî bêrê belgekerdene û têkoşîno huqûqî bêro dayene. Huqûqnasî parçeyêkê mîsyonî yê. Nê prosesî de wezîfeyê ma no yo.''