Vervatoxa HDPyî Ebru Gunay merkezê pêroyî yê partîya xo de kombîyayîşê çapemenîye kerd.

Qiseykerdişê Gunaye ra tay noqtayê girîngî wina yê:

''Îqtîdar xîret keno ke krîzê ekonomîkî pê krîzanê teberî binimno. Îqtîdar wazeno komelî bixapîno. Serekê AKPyî Erdoganî eşkera kerd ke reyna vera Sûrîye operasyon bikero. Bêguman hedefê înan Rojawan o. Na dinya de kamca de kurd est bo o ca beno hedefê Erdoganî. Erdogan armanc keno ke pê gefanê endamîya NATOyî ya Fînlandîya û Swêdî reyna Amerîka de bazarîye bikera. Yanî îqtîdarî reyna verê xo da kurdan. Erdogan bi nê hawayî û bi pêlê nîjadperestî wazeno îqtîdarê xo xurt bikero. Înan şerî ra ber çîyêk nêda kurdan û xizanîye ra ber zî çîyêk nêda şarê Tirkîya.

Eke haştîye nêba demokrasî û azadîye zî nêbenê. Rayîrê haştîye Îmrali yo. Ganî îmkan bêro dayene ke Ocalan rolê xo bîyaro ca. Pêro dinya dî ke wexto ke berê Îmraliyî abenê, aramîye yena.

Hetêk de hêrişê vera Rojawanî, hetêkê bînî de zî hêrişê vera Şingal û Mexmûrî. Rewşêka winasêne de dezgehê mîyanneteweyî yê sey Neteweyanê Yewbîyayeyan ganî bêveng nêmanê.

Konseptê şerê vera kurdan xurtkerdiş û mendekerdişê îqtîdarî ra ber çîyêk nîyo. Nê xîretî zere de zî dewaya qefilnayîşê HDPyî, dewaya Kobanê, tepiştiş û destbendkerdiş ê. Hetê bînî ra vera Rojawanî planê hêrişêkê neweyî est o. No plan planê qirkerdişê kurdan o. No plan vera ameyoxê pêro şaran o. Ma venga şaran, hêzanê demokrasî, hunermendan danê ke vera polîtîkaya şerî ya îqtîdarî wurzê we.''