Zîndananê Kurdîstanî û Tirkîya de grevê vêşanîye yê vera tecrîdê Îmraliyî û binpaykerdişanê heqanê tepişteyan 27ê teşrîna peyêne ra nata dewam kenoç

Tepişteyê Zîndanê Sîlîvrî Bariş Koçar 7 mengî verî semedê vilakerdişê medyaya dîjîtale tepişîyabi la hema zî îdîanameyê ci amade nîyo. Babîyê ci Alan Îkram Koçar da zanayene ke lajê ci grevê vêşanîye de yo û vat: ''Mi tewr peyên 28ê temmuze de lahê xo dî. Nika o grevê vêşanîye de yo. Grevê vêşanîye verî 4 rojan bi nika bîyo 15 rojan. No keyeyan rê giran o. Awe û ceyranê tepişteyan birnenê, kincê înan nêdîyenê ci, fîyatê kantînî zaf vay ê. Ez venga pêro keyeyan dana ke wa her kes wayîrê domananê xo vejîyo. Ma bê vengê înan.''

Koçerî ard ziwan ke komel de bêhîsgerîye esta û vat: ''Zîndanan de nêweşê giranî estê û nêerşawîyenê revîrî. No tecrîdêko giran o. Komel vera grevî bêhîs o. Ma xo têna hîs kenê. Ma wazenê tecrîdî biqedo. Ma ganî paştî bidê înan û hewce bo ma zî bikewê grevê vêşanîye. Ganî ma hîsger bibê.''