Weqfa Heqanê Merdiman a Tirkîya (TÎHV), Komeleya Huqûqnasanê Azadîgîran (OHD), Komeleya Huqûqnasanê Modernana (ÇHD), Komeleya Heqanê Merdiman (ÎHD), KESK û Komeleya Rojdemê Heqanê Merdiman zî tede rêxistinanê komelê sivîlî û huqûqnasan bi wesîleya Roja Paştdayîşê Bi Mexdûranê Îşkenceyî Îzmîr de eşkerayîye daye çapemenîye. 

Eşkerayîye de pankarta 'Merdimatîye wayîra rûmetê xo vejîyena, ma îşkenceyî rê vanê ney' akerde û sloganî vatî. 

Sekreterê Pêroyî yê TÎHVî Coşkun Ustercîyî eşkerayîye wende û vat: ''Ganî dewlete îşkenceyî sey hacetêkê şantajî nêşuxilna, bi hawayêkê bitesîrî sûcanê îşkenceyî bipersa û vera cezanêkerdişî têkoşîn bikera. Ganî Tirkîya goreyê peymananê vera îşkenceyî têbigêra.''

Ustercîyî pare kerd ke ganî vera îşkenceyî nê çîyî bêrê kerdene:

''-Ganî selahîyetdarî îşkence nêwasifnê û îşkence-îşkencekeran şermezar bikerê.

-Ganî peynîya polîtîkaya cezanêkerdişî bêra.

-Ganî şertê rewşa destbendbîyayîşî bê kêmasî bêrê caardene.

-Ganî zîndanî rêxistinanê heqanê merdiman û huqûqî rê bêrê akerdene.

-Ganî pêro raporê CPTyî bêrê eşkerakerdene û pêşnîyazî bêrê caardene.''