Dadgerê MHMEyî yo verên û parlamenterê CHPyî yê Îzmîrî Riza Turmeno ke qerarî ser o ANFyî rê qisey kerd ard ziwan ke no qerarê MHMEyî hem seba Tirkîye hem zî seba Demîrtaşî xeylî muhîm o. 

Turmenî vat eke Tirkîye nê qerarî rê umîş mebo do no tesdîq bikero ke tepiştişê Demîrtaşî huqûqî nê la qerarêko sîyasî yo.

REYA EWILÊNE AME ÎŞARETKERDENE

Turmenî vat rixmê protokolê MHMEyî de derheqê vîjnayîş û vîjîyayîşî de şîroweyê xeylî tengî estê zî reya ewilêne hukm ameyo dayene ke tepiştişê sîyasetkarêk îxlalkerdişê heqî yo.

Turmenî bale ante ke goreyê MHMEyî delîlê qerarê dadgeran o ke derheqê dewamkerdişê tepişteyîye de yo zî kemî yê û no îxlalkerdişê Muqaweleyê Heqanê Merdiman ê Ewropa yo.  

MUHTEWAYA CI YA SÎYASÎYE SER O AME VINDERTENE

Turmenî wina dewam kerd: “Hetê qerarî yo tewr balkêş etifkerdişê madeyê 18. yê MHMEyî yo û bi nê hawayî aseno ke dewa hetê sîyasîyî ra zî amîya ercnayene.

Qerarê MHMEyî yê derheqê madeyê 18. de ame vatene ke Tirkîye qanûnan seba ke muxalefetî bêveng bikero şuxulnena, dadgerîye xoser nêya û Selahattîn Demîrtaş bi sebebanê huqûqîyan nê la bi sebebanê sîyasîyan zere de ameyo tepiştene.”   

QERAR BESTOX O Û EMSAL O

Turmenî vatişê Erdoganî yê “Seba ma no qerar bestox nêyo” zî ercna û ard vîrî ke welatê ke endamê Konseya Ewropa yê seba înan qerarê MHMEyî bestox ê.

Turmenî da zanayene ke Tirkîye mesuldar a nê qeraran rê umîş bibo, eksê nê halî de do zextê hemverê ci hîna bibê vêşî. Turmenî da zanayene qerarê Demîrtaşî yê MHMEyî seba ke etifê parlamenteranê tepişteyan ê bînan yeno kerdene emsalî teşkîl keno.