Wezîrê Pawitişî yê Tirkîya Hulusî Akar 2ê sibate de şibi Berlinê Almanya û hemmeslega xo ya almane Annegrete Kramp-Karrenbauer reyde pêvînayîşêko derg kerd.Muxalefetê Almanya vera pêvînayîşî nêrazîbîyayîşê xo mojna.

Wekîlê Partîya Çepe Andrej Hunkoyî bale ante ser ke Akar Hewlêr û Bexdadî ra dima ameyo Almanya û babete berde Meclîsê Federalî. Hunkoyî pê vernîyazêkî persa ke pêvînayîş de hêrişê neweyî yê vera Şingal û Başûrê Kurdîstanî rojdem de bîyî yan nê.

Wezaretê Pawitişî yê Almanya cewab da vernîyazê persêkê Partîya Çepe û pare kerd ke pêvînayîş de rewşa Sûrîye û Iraqî ameyî ercnayene.

Wekîlê Partîya Çepe Gokay Akbulutî detayê pêvînayîşî persayî û bale ante hêrişanê vera Garê ser û tewirê Almanya yê vera nê hêrişan persa.

Balkêş o verî hêrişanê xo Tirkîya tim Almanya reyde pêvînayîşan kena. 2015 de hêrişanê verê şaristananê Vakurê Kurdîstanî ra verî Merkele Erdoganî reyde amebî yewca. Reyna wextê îşxalê Efrîn, Girê Sipî û Serêkanîyê de zî heman rewşe ameye dîyene.