Tecrîdê Îmraliyî di serrî yo bêmabên dewam keno. Tewr peynî de Îdarekarê Weşanê Pêroyî yê Tele1î Merdan Yanardago ke tecrîdê serê Rayberê Şarê Kurdî Abdullah Ocalanî ard rojdem, ame tepiştene û rojedemê tecrîdî cade ame qefilnayene.

Wekîlê Partîya Çep a Keske yê Muşî Sezai Temelliyî derheqê babete de ANFyî rê qisey kerd. Sezai Temelliyî nê vatî: ''Pîya bi eşkerayîya Merdan Yanardagî tecrîd reyna kewt rojdem. Tecrîdê serê Abdullah Ocalanî meseleya zaf muhîm a. Na babete hetê rayrapêroyîya Tirkîya ra zaf yena îhmalkerdene.  Ma hole zanê ke heta ke no problem bibo sîyaset nêeşkeno bibo azad. Semedê demokratîkbîyayîşî game nêerzîyenê û rejîmo otorîter xo pê nê weye keno.

 Xeylêk hetê komelî vera neheqîye, bêadaletîye qal ken la çew qala sebebê bingeyênî nêkeno. Ne qala meseleya kurdan ne zî qala tecrîdî kenê. Gerek derheqê tecrîdî de bêro qiseyekerdene. Na mesele gerek bêro muneqeşekerdene. 24 serrî yo însanêk binê tecrîdê giranî de yo. Heme heqê ci yenê xespkerdene.  Gerek hinî her kes înîsîyatîf bîgêro.  Na rewşe nîna qebulkerdene. Gerek huqûqnasî, rêxisitinê heqanê merdiman û komelê sîvîlî berpirsîyarîya xo bîyarê ca.''