Welîlê HDPyî Omer Faruk Gergerlîogluyo ke wekîlîya ci ameye wardayene Nobeta Edaletî rê dewam keno. Gergerlîogluyî Merkezê Pêroyî yê partîya xo de kombîyayîşê çapemenîye kerd.

Gergerlîogluyî vîst vîrî ke çalakîya ey roja 15 de ya û vat: ''Ma xoverdayîşo sîvîl da ke mesaj dano rayrapêroyîya Tirkîya û dinya. Na çalakîye ganî biamêyene kerdene. Îradeyê şarî ame xespkerdene ke çîyo wanayên nîno qebulkerdene. Çalakîya ma tesîrê xo ramojna. Ma heqdar ê coka bihêz ê. Ma zanê ke ma do ser bikewê. Beno ke derheqê ma de qeraranê neheqan bidê la ma pê xoverdayîşê xo ramoja her kesî ke ma heqdar ê.

Seba ke ma heqdar ê pê îftîrayan waşt ke verê ma bîgêrê. Derheqê mi de bîlsebeb qerarê tepiştî vet. 158 polîsî semedê mi ameyî. Nê dimenê şermî bî. Serê kagitî de wekîlîya mi bêro wardayene zî ez xo sey wekîlê şarî vînena. Beno ke ez çend rojî dima ra bikewê zîndan la ma Mehkemeya Qanûnê Bingeyî ra pawenê ke na neheqîye rê vajo bes o. Murcatê ma yê derheqê wardayîşê wekîlîye ewro ame redkerdene. Derheqê nayî de ma do şirê Mehkemeya Heqanê Merdiman a Ewropa.

Zaf embazê zîndan de yê. Wekîlîya Leyla Guven û Musa Farisoglulari dîyaye war la nayî meseleya kurdî çareser nêkerd. Pê destê dewlete heqê merdimîye yenê binpaykerdene. Ez wazena şarê tirkî rê vajî: Meseleya kurdî esta û na şarê kurdî nêvete. Hetê dewlete ra ameye vetene. Şarê bînî eşkenê meseleya kurdan çareser bikerê. Ez veng dana heme komelê Tirkîya: Ez bi xo kurd nîya, seba ke mi çareserîya meseleya kurdî waşte ez karê xo ra bîya. Ganî ma pêro pîya na mesele çareser bikerê. Domanê ma pêrune mirenê. Ganî  ma na mesele zaf cîddî bigêrê dest. Komelî rê qalê min a peyênî: Bêrê ma heqanê mediman bipawê.''

.