Geverê Colemêrgî de şar vera tecrîdê serê Rayberê Şarê Kurdî Abdullah Ocalanî vejîya kuçeyan û azadîya ey waşt.

Kongera Komelê Demokratîkî (KCD), Partîya Herêman ê Demokratîkan (DBP) û HDPyî pê şîare 'Wext wextê azadîye yo' esnafî zîyaret kerdî. Esnafan pê tîlîlîyan Hemserekê KCDyî Berdan Ozturk, Hemsereka DBPyî Salîha Aydenîz û Hemsereka HDPyî Pervîne Buldan pêşwazî kerdî. Şar zî tewrê zîyaretan bi û zîyaret vurîya rayraşîyayîşêkê pîlî. Rayraşîyayîş de tecrîdê vera Rayberê Şarê Kurdî Abdullah Ocalanî ame şermezarkerdene.

Şar rixmê varayîşî  heta berê bînaya HDPyî ya Geverî rayîrî ra şi. Pervîne Buldan tîya de qisey kerd û ard ziwan ke Tirkîya de krîzê şewatî, ekonomîk û sîyasalî nêqedîyenê. Buldane vat: ''Îqtîdar hînî nêeşkeno welat îdare bikero, tede rî nêmendo ke vejîyo şarî ver.  Merak mekerê o do şiro, AKP do şiro. Ma nê varanî de dî ke rayîrî kewtê çi halî. Hîşmendîya qeyûman Gever de xo eşkera kena. Wa şarê Geverî nê kerdişan xo vîr a mekerê û sindoqan de hesab bipersê. Êyê ke her roje HDP kenê hedef wa bêrê tîya de paştdayîşê şarî yê bi HDPyî bivînê. HDP bînayêke nîyo. HDP şima yo. Hêzê çewî çin o ke HDPyî biqefilno. Ma do nêverdê. Ma qetî do ser bikewê.''