Grevê vêşanîye yê seba wedaritişê tecrîdkerişê Rayberê Şarê Kurdî Abdullah Ocalanî bi vila benî. Girewteyê dewaya TKP/ML’yî zî dest bi grevê vêşanîye kenî.

Bi nameyê girewteyanê dewaya Partîya Komunîste ya Tirkîya /Marksîst-Lenînîste (TKP/ML) Îsmaîl Yilmazî eşkerayêk daye û da zanayene ke, ê do mabênê 1-6'ê Adare de bikewê grevê vêşanîye û nê pare kerdî: ’’Grevê vêşanîye, vera faşîzm û teslîmgirewtişî de vengê xoverrodayoxan o û dewleta Tirkî ya faşîste fam kena ke manaya xoverrodayîşî na ya, coka waştişan nêvînena û wazena ke nê xoverrodayîşan bifetisnayo. Waştişê xoverrodayoxanê şoreşgeran,  welatperweran meşrû yê. Ganî şarê ma vera xoverrodayîşî de bêveng nêmano, zereyê xoverrodayîşî de ca bigêro. Bi nê amancî, bi nameyê dewaya TKP/ML’yî ma dest bi grevê vêşanîye yê 5 rojan (1-6'ê Adare) kenê.”