Wexto ke atmosfero sîyasî û komelkî yê kurdan bêro ercnayene dîyeno ke eke yewîya neteweyîye nêba nêbena. Bi taybetî hêrişê dewleta tirke yê vera çar parçeyanê Kurdîstanî hewcedarîya seba yewîya neteweyîye hîna eşkera kenê. Serranê peyênan de Vakurê Kurdîstanî de seba yewîya kurdan gamê girîngî erzîyayî.

24ê teşrîna verêne ya 2020î de partîyê sîyasî yê kurdan seba ke xebatanê yewîya neteweyîye û hêrişanê vera kurdan biercnê Amed de ameyî pêser. Kombîyayîşê îtîfaqî de HDP, KCD, Partîya Herêman ê Demokratîkan (DBP), Komeleya Kurdan a Demokrat-Şorişgêre (DDKD), Partîya Azadî ya Merdiman (PÎA), Partîya Komunuste ya Kurdîstanî (KKP), Platformê Demokratanê Kurdan (PDK-Vakur), Partîya Demokrate ya Kurdîstanî ya Tirkîya (KDP-T) û Partîya Azadîye ca girewtêne û nê partîya bire daye ke 'îtîfaqê Kurdîstabî' mende bikerê.

Hetkarê Serekê Pêroyî yê Partîya Merdiman û Azadîye Ahmet Kayayî derheqê bingeyê teorîkî yê îtîfaqê neteweyî de ANFyî rê qisey kerd.

Kayayî ard ziwan ke yewîya neteweyîye seba kurdan sey awe û nan hewce ya û kurdî neçare yê ke yewîye de bêrê pêser. 

Kayayî pare kerd ke bingeyo sîyasî yê kurdan ganî pîya bêro xurtkerdene û vat: ''Kurdê muhafazakarî qerqilîyenê ke mîyanê bingeyê çepgîrî de ê zêdêr nênê temsîlkerdene. Nê kesî zêdêr derdê xo zî nêanê ziwan. Îtîfaqê ma de her kes taxêka cîya ra ameyo. Ganî no hêz bido merdiman; ganî ma meseleyanê xo nîqaş bikerê û ganî her mekanîzmaya ma bêra temsîlkerdene.''

Kayayî îfade kerd ke mîyanê pêro neteweyan de cîyatîyî estê û wina dewam kerd: ''Coka ganî rêxistinê ke yewîya neteweyîye anê ca ganî zerrî û canî ra nêzdîyê yewbînan bibê. Ganî ma kêmasî û şaşîtîyanê xo bîyarê ziwan û bi dîyalog û rexneyan nînan raşt bikerê.Eke wina nêbo yewî û îtîfaqo neteweyî sey babeta bazirganîye dîyena. Herinda ke merdimî bikewê peyê barêkê pasta ganî armanc bikerê ke na pasta bêra pîlkerdene.''

Kayayî da zanayene ke qet yew têgêrayîşo sîyasî nêeşkeno pêro netewe temsîl bikero û vat: ''Ganî têgêrayîşêk têgêrayîşanê bînan sey kêm nêvîno. Ganî ma paştî bidê her hetê komelî. Eke ma bala xo bidê nê krîteran ser o çax ma eşkenê îtîfaqê xo mende bikerê.''