Serekê Amerîka Donald Trumpî hewna ke mucadeleyê hemverê DAÎŞî dewam keno qerarê ancîyayîşî girewtibi, no qerar hem hetê Wezaretê Pawitişî ra û hem zî hetê endamanê partîya ê ra amebi rexnekerdene.

Endamê Partîya Komarperwere senator Lindsey Grahamo ke qerarê Trumpî xeylî sert rexne kerdibi da zanayene ke pêvînayîşê êyê vizêrînî yê Trumpî de Trumpî vato ke hadre yo ‘ancîyayîşî bikero hêdî.’    

 ‘FAM KENO KE GANÎ MA NÊ KARÎ BIQEDÎNÊ’

Grahamî vat ke ê fikarê xo yê derheqê zihîfbîyayîşê mucadeleyê hemverê DAÎŞî ardê ziwan û pêvînayîşî ra dima ‘fikarê ci qedîyayê.’

Grahamî vat ke serekê Amerîka Trump biqerar o ke çeteyanê DAÎŞî verê ancîyayîşî bi temamî biqedîno û vat: “Serek fam keno ke ganî ma nê karî biqedînê.” 

 ‘MA DO BI HAWAYÊKÊ BIAQILÎ BIKERÊ HÊDÎ’

Senatoro Komarperwer Lindsey Grahamî wina pa best: “Ma do ancîyayîşî bi hawayêkê biaqilî hêdî hêdî bikerê.”

Qerarê serekê Amerîka Donald Trumpî yê ancîyayîşî dewrêk de amebi eşkerakerdene ke gefê îşxalî yê dewleta Tirkîya bîbî vêşî. No qerar hetê Wezaretê Pawitişî, artêşa Amerîka û sîyasetkaranê Komarperwer û Demokratan ra amebi rexnekerdene. Amebi vatene ke do qerarê ancîyayîşî hem zirar bido mucadeleyê hemverê DAÎŞî û hem zî Kurdan destveng verdo, qerarî ser wezîrê Pawitişî Jim Mattisî gureyê xo ra îstîfa kerdibi.