Grevê vêşanîye yê Stockholmî roja 3.de yo

Stockholm de grevê vêşanîye ke semedê wedartişê tecrîdê serê Rayberê Şarê Kurdî Abdullah Ocalanî dest pêkerdbi roja 3. de yo.

Paytextê Swêdî Stockholm de çalakîya grevê vêşanîye ya Kurdistanijan û dostanê înan dewam kena.

Vizêr parlamenterê Partîya Çepî Daniel Riazatî çalakîya ke ci rê eleqeya girde esta zîyaret kerd. Riazatî mesajê paştîdayîşî da û vat ke înan sey Partîya Çepî waşt ke PKK lîsteyê terorî ra bêro vetene û semedê bicaardişê naye xebatê înan dewam kenî.

Çalakwanan ra Zerdeşt Îbrahîmo ke Başûrê Kurdistanî ra yo ANFyî rê qisey kerd. Îbrahîmî bale ante muhîmîya rolê Ocalanî ser û va: ‘‘Ma tena wedartişê tecrîdî nê, esasî de azadîya ey wazenê. Ganî CPT cade şiro Îmrali û derheqê weşîya Ocalanî de bi raporyêk zanayîş bido rayapêroyî.’’

Îbrahîmî vist vîrî ke bi mîlyonan kesan Ocalan sey rayber qebûl kerdo û wina domna: ’’No tecrîd heme kurdan rê beno. Başûr de zî şar paştî dano Ocalanî û wazeno ke o serbest bêro veradayene la tersê PDKyî ra eşkera nêeşkeno bîyaro ziwan. Eke ma yew bê, pîya tê bigêrê çew nêeşkeno bi ma.’’