Grevê vêşanîye yo ke 17ê Kanûne de bajarê Strasbourgî yê Fransa de seba protestokerdişê tecrîdê girankerdeyî yê serê Rayberê Şarê Kurdî Abdullah Ocalanî amebi destpêkerdene 10 rojê xo pey de verdayî.
Grevê vêşanîyê yê vera tecrîdî ke Strasbourgî de yena viraştene roja 11. de yo. Çalakwanê ke 24 saet binê kontrolê doktoran de yê moralê înan zaf berz o. Çalakwanî bi qerardarîya girde vanê ke heta bicaardişê waştişê înan, çalakîya înan do dewam bikero.
Bajarê Strasbourgî yê Fransa de grevê vêşanîye yo bêdem-bêagêrayîşo ke seba wedartişê tecrîdê serê Rayberê Şarê Kurdî Abdullah Ocalanî û paştîdayîşê çalakîya grevê vêşanîye yê parlamentera HDPyî ya Colemêrgî Leyla Guvene hetê “Însîyatîfê Ocalanî rê Azadî” ra amebi destpêkerdene kewt roja 11ine.
Doktor Fahretîn Gulşen derheqê rewşê çalakwanan de nê vatî:
‘‘Ma kontrol de tesbît kerd ke mabênê 3 û 6î de vîndkerdişê kîloyî esto la hetî bînî ra çîyêko xirab çîn o. La des rojan de hendê vîndkerdişê kîloyî normal nêyo. Ê ke çalakwanan zîyaret kenî ganî bidîqet bî. Ê ke nêweşê wa temas mekerî. Serra 2012 de zî Ewropa de grevê vêşanîye ame viraştene. Xora şarê ma na babete de wayîr tecrubeyî yo. Sey grevê 2012 na rey zî temasê ma bi Doktoranê Sinor Nasnêkerdeyan esto.‘‘
Bi sebebê tehtîlê Noelî dezgehê fermî yê bajarî qefilnayeyî. Coka pêdîyayîşê bi CPT, KE, PEyî nê rojan de nênî viraştene.
