Grevê vêşanîye yê Strasbourgî yo ke bi waştişê wedartişê tecrîdê serê Ocalanî yeno viraştene rê eleqedarîya girde esta.

Partîya Şorişgêr, Meclîsê Surgunanê Ewropa, Federasyonê Komelanê Êzidîyan (NAV-YEK), Têgêrayîşê Cinîya Azade yê Êzidî (TAJ-E), Meclîsê Dîaspora yê Şengalî, Platformê Hunermendan ê Êzîdî, Cematê Îslamî yê Kurdistanî (CÎK) Hunermendê TEV-ÇANDî, û xeylî dezgeyanê bînan çalakwanî zîyaret kerdî û paştî da înan.

Sîyasetmedaro Kurd Serhat Bucak zî grevê vêşanîye zîyaret kerd û vat ke tarîxê Kurdistanî bi xoverdayîşanê girdan şekil girewt.

 Hunermend Marûf zî bi deyîranê xo paştî da çalakwanan.

Serekê Meclîsê Şengalî Fîkret Îgrekî  vat ke mi şima rê silamê çalakwanan ê Silêmanîye ardî.

Bi nameyê TAJ-E Zero  Alî ard ziwan ke ê sey Şengalijî do bîbê leteyêkê na çalakî.

Bi nameyê Partîya Şorişgêrî Huseyîn Atasî zî mesajê xoverdayîş û yewbîyayîşî dayî.