Grevê vêşanîye yê Strasbourgî, Merkezê Komelê Kurdan de, 17ê Kanûne de dest pêkerdibi. Roja çalakîye ya 42yine de, bi seyan kesî ameyî zîyaret.

TEMSÎLKARÊ XEYLÎ SAZÎYAN AMEYÎ STRASBOURG

Roja 42yine ya çalakîye de Serekê Partîya Îslamîya Kurdistanî Hîkmet Serbilind, sosyolog Kadîr Amaç, rojnameger Saît Ozturk, endamê KNK‘yî Raîf Gefur, hemserekê KONGRA-GEL‘î Remzî Kartal û endamê Heyetê Rayberdişî yê KCK‘yî Zubeyîr Aydar ameyî zîyaret û xoverdayoxî tena nêverdayî.

Reyna îdarekarê Federasyonê Elewîyanê Demokratîkî yê Swîsre, endamê Merkezê Kulturê Elewîyan ê Almanya yê bajarê Bruchsalî, Kurdîstanijê bajaranê Bruksel û Anversî yê Belçîka, endamê Merkezê Kulturê Kurdan ê Belçîka, îdarekarê HDK‘yî yê Belçîka zî ameyî zîyaret.

ENDAMANÊ DÎASPORAYA ÊZÎDÎYAN RA PAŞTDARÎYE

Hemserekê Meclîsê Dîaspora yê Şengalî Fîkret Îgrek û xeylî kesî zî eyaletê Almanya Saarland ra ameyî zîyaret. Kurdîstanijan paştdarîya xo kerde eşkera û vat sey her hetê Ewropa, Saarland de zî do çalakîyanê paştdarîye bivirazê û vengê xo bikerê berz.

Fîkret Îgrek û xeylî Êzîdîyî serra 2016‘î de, seba ke tecrîdê serê Rayber Ocalanî bêro wedaritene kewtîbî grevê vêşanîye. Grevî 21 rojî dewam kerdibi û pêvînayîşê Mehmet Ocalan û Rayber Ocalanî ra dima, bi waştişê Rayber Ocalanî qedîyabi.

CIWANAN XOVERDAYOXÎ TENA NÊVERDAYÎ

Yew gruba ciwanan zî bajarê Fransa Mulhouse ra amî û xoverdayoxî zîyaret kerdî. Ciwanan derheqê mucadele û xoverdayîşî de sohbet kerd.

Hetê bînî ra bajaranê Almanya, Fransa û Swîsre ra xeylî grubê bînî zî ameyî Strasbourg.

KESÊ KE GREVÊ VÊŞANÎYE DE YÊ KAM Ê?

Seba ke tecrîdê serê Rayberê Şarê Kurdî Abdullah Ocalanî bêro wedaritene, 14 kesan, 17‘ê Kanûne de dest bi grevê vêşanîye kerdibi. Kesê ke grevê vêşanîye de yê wina yê: Hemserekê KCDK-E‘yî Yuksel Koç, parlamentera HDP‘yî ya Riha ya verêne Dîlek Ocalane, sîyasetmedar Mustafa Sarikaya, rojnamegere Gulîstan Çîya Îke, Nurgûl Başarane, Ramazan Îmîr, Mehmet Nîmet Sevîm, Mohamad Ghaderî, Denîz Surgut, Ayvaz Ece, Kardo Bokanî, Kerem Solhan, Agît Ural û Ekrem Yilmaz.