Tirkîya ke binpaykerdişê heqan her tim zêdîyeno de badê serreke û nême ra dima reyna grêvê vêşanîye rojdem de yê. Tepişteyanê PKK û PAJKî semedê baleantişê serê tecrîdê Rayberê Şarê Kurdî Abdullah Ocalanî û  binpaykerdişanê heqan ê zîndanan grevê vêşanîye da destpêkerdene.

Grevê vêşanîye ke 27ê teşrîna peyêne de ame destpêkdene sey 5 rojan bidem-biagêrayîşî yê yeno kerdene. Çalakîya ke zîndananê cîya cîyayan de hetê xeylêk tepişteyan ra yena kerdene siba do grûba diyîne dewr bîgiro. Seba ke rîyê pandemî ra pêvînayîşê avûkat û keyeyan ameyî kêmkerdene nîno zanayeneke çend zîndanan de çend kesî grev de yê.

Grûba verêne de kesanê ke ca girewt ra tay nameyî wina yê: Samsun: Huseyîn Koç, Riha: Erkan Bayrak, Wan: Îhsan Bulut û Muzafer Acu, Bakirkoy: Lorîne Înanç, Xarpêt: Mehmet Askerî Duman, Ankara-Sîncan: Saadete Akin, Necla Yildiz û Arjîne Yuksekbag, Kirikkale: Mehmet Emîn Urper, Şukru Çîçêk, Sabah Dayan û Serhat Çagli, Mersin-Tarsus: Nurcane Aslan, Hatîce Kaymak û Fatma Besê, Îzmîr-Kiriklar: Sertaç Kiliçarslan, Ozan Alpkaya û Abdullah Gunay, Kocaelî-Kandira: Wekîla verên a HDPyî Çaglare Demirel û Seher Orçu.