Nobeta Azadîye ya ke 25ê hezîrana 2012î de hetê Înîsîyatîfê Abdullah Ocalanî rê Azadîye rê seba azadîya Rayberê Şarê Kurdî Abdullah Ocalanî dîyabî destpêkerdene, dewam kena.

Hewteyê 519. de nobete hetê grûba ke bajarê Bielefeldî yê Almanya ra ameye ra ameye dewrgirewtene. Grûbe de Îsmaîl Gumuş, Îlhamî Ayaz û Serhat Yilmaz ca genê.

Îsmaîl Gumuşê ke bi nameyê grûbe qisey kerd bale ante muhîmîya çalakîye ser û vat: ''Bi serran o rayberê kurdan binê tecrîd de yo la welatê Ewropa bêveng ê. Ma têna wedaritişê tecrîdî nê, ma wazenê wa Rayberîya ma bibo azad. Rayberîye semedê haştîye û hûzûrê heme şaran têkoşîn keno. Ganî welatê Ewropa nê bivînê. Dinya de bi mîlyonan kesî azadîya Rayberîye wazenê. Ewropa wa nê waştişan nêvînayîşî ra mero. Dewletê Ewropa çeke danê Tirkîya û keyeyê Barzanî erdê Kurdîstanî peşkeşê dişmenî keno.  Pê destê PDKyî qicê ma şehîd benê. Keyeyê Barzanî ganî cade na xeletîye ra agêro. Şarê kurdî her ca de vera hêrişan payra yo û xoverdayîşê gerîlayan bêmabên dewam keno. Heta azadîya Rayberîye do têkoşînê ma dewam bikero.''