Hemvervatoxa HDPyî Ebru Gunay bînaya DBPyî ya Amedî de kombîyayîşê çapemenîye kerd û rojdem ercna.

Gunaye hêverî qurbanê Qirkerdişê Şingalî yad kerdî û bale ante hêrişanê Tirkîya yê vera Şingalî ser. Gunaye vat: '' Hêriş û qirkerdişê vera êzidîyan bêmabên dewam kenê. La êzidîyî do bibê hîna qewetîn û nasnameyê xo bipawê. Qirkerî zî temamîya tarîxî de tim bêrê naletkerdene.''

Gunaye bale ante rewşa Aysele Tugluk ser û vat: ''Mehkeme pê zorî Dewaya Kobanê de îfadeyê Aysele Tugluk gêna. Aysele Tugluk nêweşa demansî ya û îdareyê zîndanî seba nuştişê waştişnameyî ci rê teda keno. Dezgehê Tipê Edlîyî nêweşê demansî Çevîk Bîrî rê raporê pozîtîfî dano la Aysele Tugluk rê raporê negatîfî dano. Seba ke Aysele Tugluk cinîya kurde ya ci rê wina yeno kerdene.  Veranêdîyayîşê Tugluke dişmenîya vera kurdan a, îşkenceyo eşkera yo û kerdişêkê polîtîkaya rehîneyan o.  Ewro tepişteyanê sîyasîyan ê Makbule Ozer rê huqûqê dişmenîye yeno caardene. 

Partîya ma bi şîarê 'Çareserî ma yê, şer û kolonyalîzmî rê nê' 6ê tebaxe de Amed de û 7ê tebaxe de Îstanbul de mîtîngan bikera. Ma venga şarê xo danê ke bi xurtî tewrê nê mîtîngan bibê. Ma pîya çareserîye vajê û vera şerî wurzê we. Ma do mîtînganê xo de vera tecrîdî têbigêrê. Birêz Ocalan binê tecrîdî de yo ke aktorê çareserîya meseleya kurdan o. Bi tecrîdkerdişê Ocalanî vengê komelî yeno birnayene. No bêhuqûqî, metodêkê faşîzmî û zorbazî yo. Ma do bi xurtî vera ney vejîyê.''