Gunaye: Ganî azadîya Ocalanî waştişê her kesî bo

Vervatoxa HDPyî Ebru Gunay îfade kerd ke ganî wedaritişê tecrîdê Îmraliyî waştişê her kesî bo û vat: ''Ma sey HDP seba ke blokê antî-faşîstî yê tewr hîrayî awan bikerê têkoşîn danê destpêkerdene.''

Vervatoxa HDPyî Ebru Gunay bînaya HDPyî ya Îstanbulî de komnîyayîşê çapemenîye de rojdem ercna.

Qiseykerdişê Gunaye ra beşêk wina yo:

''Wextanê peyênan de vera ziwan, nasname, kultur û ercanê kurdan hêrişê sîstematîkî yenê kerdene. Hêrişê vera karkeranê kurdan ê Sakarya ra dima Afyon de zî netîceya hêrişê nîjadperestî de karkerêk ame qetilkerdene. Na hîşmendîye Wan de tabelayê kurdkî wedaritî. Tirkîya de nîjadperesyî hewce nêkenê ke xo binimnê. Dinya vera vîrusî têkoşîn kena la ma vera nîjadperestîye têkoşîn kenê. 

Heta ke dewlete bipawa nîjadperestîye bena pîlêr. Têna 'hîşmendîya demokrasî' û bloko antîfaşîst eşkenê verê nîjadperstîye bigêrê.

Kurdî heta nika vera hêrişan wayîrê nasnameyê xo vejîyayî û naye ra pey zî do vejîye. Ma nê nîjadperestan hîşyar kenê ke kedkarê kurdî bêwayîr nîyê. No şar bi têkoşînî do azadîye bivisno destê xo. 

Hîşmendîya tecawuzî ya ke Terteleyê 38î de vera cinîyanê Dêrsimî amebî kerdene, nika zî hetê leşker û polîsan ra Kurdîstanî de dîyena dewamkerdene. Têkoşîno rêxistinkerde yê cinîyan do destûr nêdo na hîşmendîye.

Aktoro tewr girîng ê haştîye Ocalan o. Ma prosesê çareserîye de girîngîya ey dîye. Tecrîdê vera Birêz Ocalanî pêro meseleyan keno giranêr. Seba ke haştîye bêra caardene ganî kurdan ra zêdêr tirkî wedaritişê tecrîdî biwazê. 

Her ca de hêrişê bitehlukeyî zêdîyayî. Seba ke ma verê nê hêrişan bigêrê ganî bi hawayêkê hemparî têkoşîn bikerê. Coka ma cade têkoşînê awankerdişê blokê antîfaşîstî yê tewr hîrayî danê destpêkerdene. Ma venga pêro şaran danê ke verê xo bidê xîretê awankerdişê welatêkê demokratîkî.''