Vervatoxa HDPyî Ebru Gunay bînaya merkezî ya HDPyî de kombîyayîşê çapemenîye kerd û rojdem ercna.

Qiseykerdişê Gunaye ra beşêk wina yo:

''107 zîndanan de 2 hezar tepişteyê sîyasîyî 64 rojî yo grevê vêşanîye de yê. Tepişteyî seba ke tecrîdê Îmraliyî û binpaykerdişê heqanê înan biqedê xo ver danê. Tirkîya de hînî merdimî pê findan gêrenê edaletî. Bi hezaran merdimî vera neheqîye xo vêşan verdenê.  La hukmat vano ê îdareyêko demokratîk ê. Komîsyonê Teqîbê Grevê Vêşanîye xebetanê xo dewam keno. Ma proses nêzdî ra teqîb kenê. Waştişê tepişteyan waştişê ma yê.

Hukmatê AKP-MHPyî têna Vakur de nê Rojawan û Başûr de zî kurdan rê dişmenîye keno. Efrînî ra heta Serêkanî, Girê Sipî, Qamişlo û Başûrî hukmat hêrişê sivîlan keno. Nê herêman de serebûtê remnayîş, koçkerdiş û talanî qewimîyenê. Çend rojî verî hêrişê artêşa tirke yê vera Til Rifatî de 3 sivîlî merdî û 6 sivîlî zî birîndar bîyî. Wezaretê Pawitişî hêriş mîyan kerd û kesê ke kişîyayî sey terorîst name kerd.

Seba hukmatî sivîl, kurd, rojawanijî pêro merdimî terorîst ê û qirkerdişê înan heq û meşrû yo. Hukmat qanûnanê mîyanneteweyîyan binpay keno. Ê kesê ke sivîlan qetil kenê wa baş bizanê ke têkoşê edaletî yê ma dewam keno. Ma do hesabê sivîlanê Rojawanî bipersê. AKP wazeno Başûr û Rojawan bi temamî îşxal bikero. Ganî îdare û kurdê Başûrî zî naye hol bizanê. Ganî kurdî yewîya xo hînî biyarê ca.

Hukmatê AKP-MHPyî hînî huqûq nas nêkeno û vera Birêz Ocalanî tecrîdêkê giranî keno. Zîndanan de bi hezaran tepişteyî grevê vêşanîye de yê. Bi hezaran tepişeyî venga hukmatî danê ke wa abigêro heq û raştîye ser. Seba ke tecrîd biqedo ma do têkoşînê xo pîlêr bikerê.''

Gunape peynî de venga hukmatî da ke wa cade tecrîd wedaro.